ევროკავშირი საქართველოს მიკროფინანსური დახმარების მეორე ტრანშის გამოყოფისთვის პირობას უყენებს. ამის შესახებ ნათქვამია ევროკავშირის საგარეო ქმედებათა სამსახურის განცხადებაში, რომლითაც საქართველოში უზენაესი სასამართლოს მოსამართლეების შერჩევის პროცესს ეხმიანება.
როგორც განცხადებაში ვკითხულობთ, ევროკავშირი იმედგაცრუებულია, რომ საქართველოს პარლამენტმა ნაჩქარევად შეიმუშავა და მიიღო ეს ცვლილებები ინკლუზიური კონსულტაციის პროცესის გარეშე.
"1-ელ აპრილს საქართველოს პარლამენტმა მიიღო საკანონმდებლო ცვლილებები, რომლებშიც გადახედილია უზენაესი სასამართლოს მოსამართლეთა შერჩევის პროცესი. ევროკავშირმა არაერთხელ გამოხატა შეშფოთება შერჩევის ამ პროცესისა და გამოყენებული წესების ნაკლოვანებებზე.
მიუხედავად იმისა, რომ ევროკავშირი მიესალმება შესარჩევი პროცესის სამართლებრივი ჩარჩოს ცვლილებების ინიციატივას, იმედგაცრუებას იწვევს, რომ საქართველოს პარლამენტმა ნაჩქარევად შეიმუშავა და მიიღო ეს ცვლილებები ინკლუზიური კონსულტაციის პროცესის გარეშე. ვწუხვართ, რომ საქართველომ წარსულში უკვე შეიტანა ნაჩქარევად ცვლილებები ამ კანონმდებლობაში ვენეციის კომისიისთვის დროული მიმართვის, ან საბოლოო დასკვნის ლოდინის გარეშე.
ამგვარად, ევროკავშირი მტკიცედ ურჩევს საქართველოს, რაც შეიძლება მალე მიმართოს ვენეციის კომისიას შეფასების თხოვნით, შეესაბამება თუ არა მიღებული შესწორებები მის წინა რეკომენდაციებს. ვენეციის კომისიის მიერ დამტკიცებული ახალი წესები უნდა გავრცელდეს ყველა აპლიკანტზე.
უკიდურესად მნიშვნელოვანია, რომ საქართველოს უმაღლესი სასამართლო ინსტანცია, უზენაესი სასამართლო შედგებოდეს უმაღლესი პროფესიონალური კომპეტენციის და პატიოსნების მქონე მოსამართლეებისგან. ვენეციის კომისიის რეკომენდაციების შესაბამისად, უზენაესი სასამართლოს მოსამართლეების შერჩევის პროცესის გადახედვა არის საქართველოსთვის მიმდინარე პროგრამის ფარგლებში მაკროფინანსური დახმარების მეორე ტრანშის გამოყოფის პირობა", – ნათქვამია განცხადებაში.
