შრი ლანკის დედაქალაქ კოლომბოში გაიმართა კონკურს „მისის შრილანკას“ დაჯილდოების ცერემონია, სადაც მომხდარმა ინცინდენტმა მთელი მსოფლიო ყურადღება მიიპყრო.
კონკურსის გამარჯვებულად პუშპიკა დე სილვა გამოცხადდა, რომელსაც ორგანიზატორებმა გვირგვინი დაადგეს თავზე. რამდენიმე წუთის შემდეგ, კონკურსის 2019 წლის გამარჯვებულმა სცენიდან გამოაცხადა, რომ დე სილვას არ ჰქონდა ჯილდოს მიღების უფლება, ვინაიდან ის განქორწინებული იყო. რის შემდეგაც ის მივიდა პუშპიკა დე სილვასთან და გვირგვინი თავიდან მოაგლიჯა.
2019 წლის გამარჯვებულმა გვირგვინი მეორე ადგილზე გასულ კონკურსანტს მოარგო თავზე.
გავრცელებულ ვიდეოში ჩანს, რომ პუშპიკა დე სილვა წინააღმდეგობას ვერ უწევს ქალს და ატირებული ტოვებს სცენას. როგორც მოგვიანებით გაირკვა, დე სილვამ თავზე დაზიანებები მიიღო და სამედიცინო დახმარება დასჭირდა.
მოგვიანებით, კონკურსის ორგანიზატორებმა ბოდიში მოიხადეს მოულოდნელი ინციდენტის გამო და გვირგვინი პუშპიკა დე სილვას დაუბრუნეს. მათი განმარტებით, დე სილვას კონკურსის პირობები არ დაუღვევია, რადგან მიუხედავად იმისა, რომ ქმართან ერთად არ ცხოვრობს, ოფიციალურად განქორწინებული ჯერ არ არის.
