რომის პაპმა ფრანცისკემ მრევლს ტრადიციული სააღდგომო მიმართვა Urbi et orbi (ქალაქისა და მსოფლიოსადმი) წაუკითხა.
კორონავირუსის პანდემიის გამო, გასული წლის მსგავსად, წლევანდელი მიმართვაც მეტად მოკრძალებულად წარიმართა, ცერემონიას მხოლოდ 200-მდე ადამიანი ესწრებოდა. უწინ რომის კათოლიკური ეკლესიის წინამძღვრის მიმართვას ვატიკანში, წმინდა პეტრეს მოედანზე ათასობით მორწმუნე ესწრებოდა.
სააღდგომო მიმართვაში რომის პაპმა მსოფლიოს მშვიდობისა და საერთაშორისო სოლიდარობისკენ მოუწოდა.
"პანდემია კვლავ აქტიურია და მის მიერ გამოწვეული სოციალური და ეკონომიკური კრიზისი მძიმე ტვირთია, განსაკუთრებით უღარიბესი მოსახლეობისთვის. გარდა ამისა, უკიდურესად აღმაშფოთებელია, რომ შეიარაღებული კონფლიქტები არ წყდება და სახელმწიფოები სახსრებს არ ზოგავენ სამხედრო ძალის გასაზრდელად", - თქვა უმაღლესმა პონტიფიკოსმა.
რომის კათოლიკური ეკლესიის მეთაურმა თავის მიმართვაში ისაუბრა ეთიოპიაში, ლიბანში, სირიასა და იემენში დაუსრულებელ კონფლიქტებზე, მათ შორის ახსენა აღმოსავლეთ უკრაინა და მთიანი ყარაბაღი.
პაპის განცხადებით, ყველა მონაწილე მხარემ ყველაფერი უნდა იღონოს, რათა დაასრულოს ეს კონლიქტები და დაძლიოს "სამხედრო მენტალიტეტი".
რომის პაპმა ფრენსისმა ხაზი გაუსვა პანდემიით დაზარალებულთა დახმარების აუცილებლობას, განსაკუთრებით ღარიბების მიმართ.
მან საერთაშორისო საზოგადოებას მოუწოდა, გადალახონ სირთულეები კორონავირუსის ვაქცინების წარმოებასა და მომარაგებაში და სოლიდარობა გამოავლინონ მათ განაწილებაში.
ქრისტიანული ეკლესიების უმეტესობა დღეს, 4 აპრილს ქრისტეს აღდგომის დღესასწაულს ზეიმობს.