აღსანიშნავია სამხარაულის სახელობის ექსპერტიზის ბიუროს მხრიდან ექსპერტიზის დასკვნების დროულად მომზადების დადებითი ტენდენცია. ამის შესახებ ნათქვამია სახელმწიფო ინსპექტორის სამსახურის 2020 წლის საქმიანობის ანგარიშში, რომელიც პარლამენტს წარედგინა.
"სახელმწიფო ინსპექტორის სამსახურის მიერ 232 პირის მიმართ დანიშნული სამედიცინო ექსპერტიზიდან დასკვნა მიღებულია 204 პირზე (88%). აუცილებლად უნდა აღინიშნოს დადებითი ტენდენცია ლევან სამხარაულის სახელობის სასამართლო ექსპერტიზის ეროვნული ბიუროს მხრიდან ექსპერტიზის დასკვნების დროულად მომზადებასთან დაკავშირებით. ბოლო თვეების განმავლობაში საგრძნობლად შემცირდა სახელმწიფო ინსპექტორის სამსახურის წარმოებაში არსებულ სისხლის სამართლის საქმეებზე ექსპერტიზის ჩატარების ვადები.
სამედიცინო ექსპერტიზის დასკვნები, ძირითადად, მიღებულია ექსპერტიზის დანიშვნიდან 60 დღის ვადაში. ექსპერტიზის დროულად ჩატარება პირდაპირ კავშირშია ეფექტიან გამოძიებასთან. შესაბამისად, ამ მიმართულებით მდგომარეობის კიდევ მეტად გასაუმჯობესებლად, სახელმწიფო ინსპექტორის სამსახური და ლევან სამხარაულის სახელობის სასამართლო ექსპერტიზის ეროვნული ბიურო აქტიურ თანამშრომლობას გააგრძელებენ", - ვკითხულობთ ანგარიშში.
