ევროპული საქართველოს ერთ-ერთი ლიდერი, სერგი კაპანაძე, ხელისუფლებასა და ოპოზიციას შორის მოლაპარაკებების პროცესს ეხმაურება და განმარტავს, რომ კრისტიან დანიელსონი დღევანდელ შეხვედრაზე დადებს დოკუმენტს იმ თემების ირგვლივ, რაც პრეზიდენტმა მიშელმა დატოვა, ხოლო არავითარი საფუძველი, რომ ოპოზიცია თავის პოზიციას შეიცვლის, ამ წუთას არ არსებობს.
კაპანაძემ აღნიშნა, რომ კრიზისის განსამუხტად საჭიროა ქართული ოცნების მხრიდან ნაბიჯის გადმოდგმა, ხოლო ეს იმ შემთხვევაში მოხდება, თუ იქნება შეთანხმება ახალ არჩევნებზე, პოლიტიკური დევნის დასრულებაზე და ფუნდამენტურ რეფორმებზე, მათ შორის, საარჩევნო კანონთან დაკავშირებით.
„ჩვენ ველოდებით დღეს, რომ ბატონი დანიელსონი კონკრეტულ დოკუმენტს დადებს, რომელიც იქნება იმ თემების ირგვლივ, რაც პრეზიდენტმა მიშელმა დატოვა. არავითარი საფუძველი არ გვაქვს ამ წუთას ვივარაუდოთ, რომ ოპოზიცია თავის პოზიციას შეიცვლის.
ჩვენ გვაქვს კონკრეტული ამოცანა, რომ ეს ქვეყანა გამოვიყვანოთ კრიზისიდან, ამას სჭირდება ახალი არჩევნების დანიშვნა და კონკრეტული გზით მისვლა ახალ არჩევნებდამდე, პოლიტიკური დევნის დასრულება და ფუნდამენტური რეფორმები.
აქედან გამომდინარე, მოლოდინი გვაქვს, რომ ამის ირგვლივ იქნება ეს დოკუმენტი. შესაბამისად, რაიმეს გამოცნობას ახლა არ დავიწყებ, ვნახავთ რა დოკუმენტი დაიდება და შემდეგ უკვე გვექნება შიდა კონსულტაციები და ჩვენს პოზიციას ამასთან დაკავშირებით დავაფიქსირებთ.
საბოლოო ჯამში, ისევე დარწმუნებულები ვართ, რომ ქართული ოცნების ნაბიჯი არის მნიშვნელოვანი იმისათვის, რომ ეს კრიზისი განიმუხტოს, რაც ერთადერთ შემთხვევაში შეიძლება მოხდეს, თუ იქნება შეთანხმება ახალ არჩევნებზე, პოლიტიკური დევნის დასრულებაზე და ფუნდამენტურ რეფორმებზე, მათ შორის, საარჩევნო კანონთან დაკავშირებით.“ - განაცხადა კაპანაძემ.
