გიორგი შაქარაშვილის განზრახ მკვლელობის საქმეში ბრალდებული ორი არასრულწლოვნის განაჩენს მცხეთის რაიონული სასამართლო დღეს გამოაცხადებს. ადვოკატები არ გამორიცხავენ, მოსამართლემ არასრულწლოვნების მიმართაც სასჯელის მაქსიმალური ზომა გამოიყენოს.
"სტურუასგან კარგი მოლოდინი ნამდვილად არ გვაქვს და ის მაქსიმუმს მიუსჯის თუ მინიმუმს, არასრულწლოვანისთვის ეს საინტერესო არ არის. მთავარი იყო ის, რომ რაც მას არ ჩაუდენია იმაში გამართლებულიყო. მან სრულწლოვნებს მაქსიმუმი მიუსაჯა, სტურუამ თავის კარიერაში ძალიან დიდი ლაქა დატოვა“, - აცხადებს არასრულწლოვან ზ. ხ.-ს ადვოკატი გიორგი გელხაური.
9 მარტს მცხეთის რაიონულმა სასამართლომ გიორგი შაქარაშვილის განზრახ ჯგუფურად მკვლელობის საქმეზე განაჩენი გამოაცხადა. სასამართლომ ხუთივე ბრალდებული დამნაშევდ ცნო.
მოსამართლე ბიძინა სტურუას გადაწყვეტილებით, შაქარაშვილის მკვლელობაში ბრალდებულს 3 პირს - არჩილ გაგნიძეს, ნიკოლოზ რევაზიშვილსა და ვახტანგ ჩიქოვანს, 16-16-წლიანი პატიმრობა მიესჯა.
შეგახსენებთ, 2020 წლის19 ივნისს, საღამოს, კლუბ "საბურთალოს“ ფეხბურთელის, გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა.
სამართალდამცველებმა, სამაშველო სამსახურმა და მყვინთავებმა შეტყობინებისთანავე სამძებრო სამუშაოები დაიწყეს. ფეხბურთელს 70 მეხანძრე-მაშველი და მყვინთავთა 7 ჯგუფი ეძებდა.
4-დღიანი უწყვეტი საძიებო სამუშაოების შედეგად მყვინთავებმა გიორგი შაქარაშვილის ცხედარი მდინარეში იპოვეს.
19 წლის ფეხბურთელის გარდაცვალების საქმეზე, შსს-მ ჯგუფური ძალადობის ორგანიზების, მასში მონაწილეობის, თავისუფლების უკანონო აღკვეთისა და ორი ან მეტი პირის მიმართ ჯგუფური ძალადობის ბრალდებით, 26 ივნისს 17 ადამიანი დააკავა.
მოგვიანებით პროკურატურამ ვიდეომასალა გაავრცელა, სადაც ფეხბურთელის სიცოცხლის ბოლო საათები და საბედისწერო ღამეს მომხდარი რამდენიმე ინციდენტია ასახული. მცხეთის რაიონულმა სასამართლომ 17-ვე ბრალდებულს აღკვეთის ღონისძიების სახით პატიმრობა შეუფარდა.
ცხედრის სამედიცინო ექსპერტიზის პირველადი დასკვნის მიხედვით, გარდაცვალების მიზეზი არის ასფიქსია წყალში დახრჩობით. გარდა ამისა, უკვე არსებულ კვალიფიკაციას დამამძიმებელ გარემოებებში ჯგუფურად განხორციელებული განზრახ მკვლელობის მუხლი დაემატება.
