ჩემი აზრით, პროცესების წინ წასაწევად აუცილებელია კონსტრუქციული დიალოგი, დებატები და კითხვა-პასუხის რეჟიმი. ცალმხრივი ბრალდებით, თავის მართლების გზით, წინ ვერ წავალთ ვერცერთ პროექტზე. არ უნდა დარჩეს არცერთი პასუხგაუცემელი კითხვა და ბრალდება, თუმცა მეორეს მხრივ, ბრალმდებელმაც უნდა მოისმინოს პასუხი, გაიაზროს, დასაზუსტებელი დააზუსტოს და იყოს ობიექტური, - განაცხადა „გალტ ენდ თაგარტის“ უფროსმა ანალიტიკოსმა მარიამ ჩახვაშვილმა.
როგორც ის აღნიშნავს, მხოლოდ პროტესტი და მეორე მხარის პოზიციის არმოსმენა ეჭვს აჩენს მაპროტესტებელი მხარის კეთილგონიერებასა და მიზნებთან დაკავშირებით.
„თუ მიზანი არაა ყველანაირ ფასად პროექტის დაბლოკვა და მართლა მის კონკრეტულ ასპექტებზე შესტკივათ გული, ყველაფერი უნდა გააკეთონ, რომ მიიღონ შესაბამისი პასუხები. ჩემი აზრით, ყველაზე საინტერესოა, კითხვებზე პასუხი მოვისმინოთ კონკრეტული ექსპერტებისგან, რომლებიც მუშაობდნენ ამ პროექტზე და მოამზადეს დოკუმენტაცია საბოლოო სახით. სწორედ მათ შეეძლებათ დეტალებში ჩასვლა და სრული, ყოვლისმომცველი და ამომწურავი ინფორმაციის მოწოდება კონკრეტული პროექტის შესახებ. ასეთი პირები უნდა დავაყენოთ წინა პლანზე, ისინი ვალაპარაკოთ და დავუსვათ კითხვები. ჩემი აზრით, ამ პროცესში უდიდესია მედიის როლი და ის აუცილებლად უნდა იყოს მიუკერძოებელი, შუამავალი მხარეებს შორის და ემსახურებოდეს ნებისმიერი საკითხის ყველა მხარის გაშუქებას“ - აღნიშნავს მარიამ ჩახვაშვილი.
საქართველოს მთავრობის გადაწყვეტილებით, ნამახვანი ჰესის პროექტთან დაკავშირებით, დამატებითი კვლევები ჩატარდება.
