საერთაშორისო სააგენტო Reuters-ის ცნობით, ნიგერიამ ჯანმრთელობის მსოფლიო ორგანიზაციის Covax პლატფორმის მეშვეობით ვაქცინის პირველი დოზები მიიღო.
ასტრაზენეკას ვაქცინის 3.92 მილიონი დოზა ნიგერიის დედაქალაქ აბუჯაში დღეს ჩავიდა.
ნიგერიის ჯანდაცვის სამინისტროს ინფორმაციით, ვაქცინის დოზების ეს რაოდენობა ხელს შეუწყობს მოსახლეობის იმუნიზაციის პროგრამის განხორციელებას.
ნიგერია, 200-მილიონიანი მოსახლეობით, დასავლეთ აფრიკის მესამე ქვეყანაა, რომელმაც Covax-ის მეშვეობით მიიღო ვაქცინა. მანამდე ვაქცინის პირველი დოზები ჩავიდა განასა და კოტ-დ'ივუარში, რომლებმაც უკვე დაიწყეს მოსახლეობის ვაქცინაციის პროგრამები.
ჯანმრთელობის მსოფლიო ორგანიზაციის (WHO) Covax პროგრამა მიზნად ისახავს უზრუნველყოს ვაქცინების სამართლიანი განაწილება ყველა ქვეყანაში.
პლატფორმის მეშვეობით წლის ბოლომდე დაგეგმილია მსოფლიოს მასშტაბით კორონავირუსის საწინააღმდეგო ვაქცინის დაახლოებით 2 მლრდ დოზის გავრცელება.