იორდანიის შინაგან საქმეთა და იუსტიციის მინისტრები თანამდებობიდან გაათავისუფლეს მას შემდეგ, რაც ისინი რესტორანში წვეულებაზე იმყოფებოდნენ, რომელიც კორონავირუსის გამო დაწესებული შეზღუდვების დარღვევით იმართებოდა.
მინისტრებს გადადგომისკენ პრემიერ-მინისტრმა მოუწოდა. მათი გადადგომის განცხადება იორდანიის მეფე აბდულა მეორემ კი დაუყოვნებლივ დააკმაყოფილა.
მინისტრების გამოჩენამ საბანკეტო დარბაზში, სადაც უგულვებელყოფილი იყო სოციალური დისტანცირების წესები, მოსახლეობაში ფართო აღშფოთება გამოიწვია, რადგან ამ წესების დარღვევის გამო მკაცრად აჯარიმებენ მოქალაქეებს, ხოლო ოფიციალური პირები დაუსჯელნი რჩებიან.
ახალი წესების თანახმად, იორდანიაში აკრძალულია 20-ზე მეტი ადამიანის შეკრება, ასევე 140 დოლარით ისჯება პირი, რომელიც არ ატარებს პირბადეს.