ისრაელმა კორონავირუსის პანდემიის გამო დაწესებული შეზღუდვების შემსუბქება დაიწყო, რადგან ვაქცინირებული მოსახლეობის კვლევა აჩვენებს, რომ Pfizer-ის ვაქცინა 95.8%-ით ეფექტურია ჰოსპიტალიზაციისა და გარდაცვალების პრევენციაში.
ისრაელის ჯანდაცვის სამინისტროს ინფორმაციით, ვირუსისგან დაავადების რისკი 95,8% -ით შემცირდა იმ ადამიანებში, რომლებსაც Pfizer ვაქცინის ორივე დოზა აქვთ მიღებული.
მათივე ცნობით, ვაქცინა 98.9%-იან ეფექტიანობას აჩვენებს გარდაცვალების პრევენციაში, ხოლოდ 99.2%-იან ეფექტიანობას დაავადების მძიმე ფორმების პრევენციაში.
ისრაელის გამოქვეყნებული მონაცემები საინტერესო და დამაიმედებელია იმდენად რამდენადაც ის ეყრდნობა რეალურ და არა კლინიკური გამოცდის შედეგებს.
21 თებერვლიდან გაიხსნა მაღაზიები, ბიბლიოთეკები და მუზეუმები, თუმცა სოციალური დისტანცირება და პირბადის ტარება კვლავ აუცილებელი იქნება.
გარდა ამისა, სპორტული დარბაზები, სასტუმროები და სინაგოგები გაიხსნება იმ ადამიანებისთვის, რომლებიც ე.წ. "მწვანე პასპორტებს" ფლობენ. "მწვანე პასპორტი" ეძლევათ ადამიანებს იმის დასტურად, რომ მათ უკვე მიიღეს ვაქცინის ორივე დოზა და ბოლო დოზის მიღებიდან გასულია სულ მცირე ერთი კვირა მაინც.
"მწვანე პასპორტით" სარგებლობა შეუძლიათ ასევე იმ ადამიანებს, რომლებიც უკვე გამოჯანმრთლდნენ ვირუსისგან, მაგრამ ჯერჯერობით რიგის მიხედვით არ უწევს ვაქცინაცია.
ამ ერთგვარი საშვით სარგებლობა შესაძლებელია მობილური აპლიკაციით და იგი მოქმედებს ვაქცინის მეორე დოზის მიღებიდან ერთი კვირის შემდეგ 6 თვის განმავლობაში.
ისრაელის ჯანდაცვის სამინისტროს ინფორმაციით, ეს უკვე ნორმალური ცხოვრების დაბრუნების პირველი ეტაპია.
ისრაელი მსოფლიოში ლიდერობს მოსახლეობის მასობრივი იმუნიზაციის თვალსაზრისით. 9-მილიონიანი მოსახლეობიდან სულ მცირე 49%-მა უკვე მიიღო ვაქცინის ერთი დოზა მაინც. დაახლოებით 3 მილიონმა მოქალაქემ კი უკვე ვაქცინის ორივე დოზა მიიღო.
ისრაელმა მკაცრი კარანტინი გასული წლის დეკემბრის მიწურულს დააწესა მას შემდეგ, რაც კვლავ იმატა კორონავირუსის შემთხვევებმა.
შეზღუდვების შერბილების მიუხედავად, ისრაელის აეროპორტები დახურული დარჩება კიდევ ორი კვირის განმავლობაში.