დონალდ ტრამპმა, რომლის უფლებამოსილების ვადის ამოწურვამდე რამდენიმე საათი დარჩა, გამოსამშვიდობებელი ვიდეომიმართვა გაავრცელა.
ტრამპის განცხადებით, მან კიდევ ერთხელ დაადასტურა "წმინდა იდეა, რომ ამერიკაში ხელისუფლება ანგარიშვალდებულია ხალხის წინაშე".
"ჩვენ გავაკეთეთ ყველაფერი, რისი გაკეთებაც გვსურდა და კიდევ უფრო მეტი", - თქვა მან.
ვიდეომიმართვაში დონალდ ტრამპმა საკუთარი თავი მოიხსენია, როგორც ათწლეულების განმავლობაში პირველი ამერიკელი ლიდერი, რომელსაც ომი არ წამოუწყია.
დონალდ ტრამპმა პირობა დადო, რომ იგი ილოცებს ახალი ადმინისტრაციის წარმატებისთვის ქვეყნის კეთლდეობისა და ეროვნული უსაფრთხოების უზრუნველყოფაში.
თავის ვიდეომიმართვაში, ის ასევე შეეხო 6 იანვარს ვაშინგტონში მომხდარ არეულობას. ტრამპის განცხადებით, დაუშვებელია ძალადობის გამართლება.
დონალდ ტრამპმა აღნიშნა, რომ თავის საპრეზიდენტო მოღვაწეობას წარმატებულად თვლის და მოუწოდა ამერიკელებს, არ დაკარგონ რწმენა ამერიკის სიდიადისა.
ჯერ კიდევ მოქმედმა პრეზიდენტმა აღნიშნა, რომ მოძრაობა, რომელსაც მან ჩაუყარა საფუძველი სწორედ ახლა იწყებს ძალების მოკრებას.
ახლა, როდესაც ხელისუფლების ახალი ადმინისტრაციისთვის გადაცემისთვის ვემზადები, მინდა იცოდეთ, რომ მოძრაობა, რომელიც ჩვენ წამოვიწყეთ, სწორედ ახლა იწყებს ძალების მოკრებას", - აღნიშნა მან.
ვიდეომიმართვაში დონალდ ტრამპს ჯო ბაიდენის სახელი არ უხსენებია.
შეერთებული შტატების პრეზიდენტად არჩეული ჯო ბაიდენის ინაუგურაცია ვაშინგტონში დღეს, თბილისის დროით 20:00 საათიდან დაიწყება. დონალდ ტრამპი ვაშინგტონს ინაუგურაციამდე დატოვებს, ის არ დაესწრება მისი მემკვიდრის ფიცის დადების ცერემონიას.