გერმანიაში კორონავირუსის გავრცელების აღსაკვეთად დაწესებული შეზღუდვები 14 თებერვლამდე გახანგრძლივდა. გადაწყვეტილება 19 იანვარს კანცლერმა ანგელა მერკელმა და ფედერალური მიწების ხელმძღვანელებმა ერთობლივად მიიღეს.
მიღებული გადაწყვეტილებით მანამდე დაწესებული შეზღუდვები კვლავ ძალაში დარჩა - ქვეყანაში დახურულია მაღაზიები, გარდა სურსათის მაღაზიებისა და აფთიაქებისა, დახურული რჩება სკოლები, საბავშვო ბაღები, სილამაზის სალონები, სპორტული დარბაზები, კინოთეატრები, მუზეუმბი და თეატრები.
გარდა ამისა დაწესდა ინფექციის გავრცელების შემაკავებელი ახალი ზომები.
ამიერიდან, მაღაზიებსა და საზოგადოებრივ ტრანსპორტში აუცილებელია მხოლოდ სამედიცინო ნიღბებისა და FFP2 რესპირატორების ტარება. მანამდე დაშვებული იყო სახის ნაწილის სხვა აქსესუარებით, მაგალითად შარფით, დაფარვა.
დამსაქმებლებს მიეცათ რეკომენდაცია, ყველა ღონე იხმარონ, რათა კიდევ უფრო მეტად გაფართოვდეს დისტანციური მუშაობის მასშტაბები.
ხელისუფლება მოქალაქეებს მოუწოდებს, მინიმუმამდე დაიყვანონ კონტაქტები სხვა ადამიანებთან.
მკაცრი ლოკდაუნი გერმანიაში 2020 წლის 16 დეკემბრიდან მოქმედებს.
გასულ კვირას, გერმანიის ფედერალურმა ჯანდაცვის მინისტრმა, იენს შპენმა განაცხადა, რომ იზრდება შეშფოთება კორონავირუსის ახალი ვარიანტების აღმოჩენის გამო, რომელიც კიდევ უფრო მეტად ვრცელდება, ვიდრე აქამდე არსებული ვარიანტი.
კორონავირუსის ახალი, აქამდე უცნობი ვარიანტი გერმანიაში, ბავარიის ქალაქ გარმიშ-პარტენკირხენში აღმოაჩინეს. ვირუსის თვისებების შესახებ დაზუსტებული ინფორმაცია ჯერ არ ვრცელდება, ელოდებიან გამოკვლევის შედეგებს.
კობერტ კოხის ინსტიტუტის მონაცემებით, გერმანიაში პანდემიის დაწყების დღიდან, ვირუსის 2 050 000-ზე მეტი შემთხვევა აღირიცხა.
ამ დროისთვის, ქვეყანაში ვაქცინა მიიღო 1 500 000-მდე მოქალაქემ.