შეერთებული შტატების კონგრესის ზედა პალატამ მუშაობა განაახლა. სენატის კომიტეტები ატარებენ მოსმენებს არჩეული პრეზიდენტის, ჯო ბაიდენის მიერ ნომინირებულ მთავრობის კაბინეტის წევრთა დასამტკიცებლად.
განრიგის მიხედვით, სენატის კომიტეტები თავდაპირველად 5 კანდიდატს მოუსმენენ. ესენი არიან:
ჯანეტ იელენი - ხაზინის მდივნობის კანდიდატი. დამტკიცების შემთხვევაში იელენი იქნება პირველი ქალი, ვინც ამ თანამდებობას დაიკავებს. მოელიან, რომ მისი მაღალი რეპუტაციის გამო, იელენის კანდიდატურა ორპარტიულ მხარდაჭერას მოიპოვებს.
ავრილ ჰაინესი - ეროვნული დაზვერვის დირექტორობის კანდიდატი. დამტკიცების შემთხვევაში ის ასევე იქნება პირველი ქალი ამ თანამდებობაზე.
ალეხანდრო მაიორკასი - შიდა უსაფრთხოების მდივნობის კანდიდატი. დამტკიცების შემთხვევაში ის იქნება პირველი ლათინოამერიკელი კაბინეტის წევრი, რომელიც ზედამხედველობას გაუწევს საემიგრაციო პოლიტიკას.
ენტონი ბლინკენი - სახელმწიფო მდივნის თანამდებობაზე.
ლოიდ ოსტინი - თავდაცვის მდივნის თანამდებობაზე. დამტკიცების შემთხვევაში, ოსტინი იქნება პირველი შავკანიანი, რომელიც პენტაგონს ჩაუდგება სათავეში.
ლოიდ ოსტინის თანამდებობაზე დამტკიცებას როგორც სენაატის, ასევე წარმომადგენელთა პალატის თანხმობა სჭირდება, ვინაიდან მისი სამხედრო სამსახურიდან წასვლის შემდეგ 7 წელი ჯერ არ გასულა. ასეთ შემთხვევში, საკანონმდებლო ორგანო საგამონაკლისო წესით განიხილავს კანდიდატურას.
გარდა საკომიტეტო მოსმენებისა, სენატში ძალაუფლების განაწილებაზე უნდა შეთანხმდნენ. ჯორჯიის შტატის ორ ოლქში არჩევნების მეორე ტურში დემოკრატების გამარჯვების შემდეგ, სენატში არსებული 100 მანდატი თანაბრად გადანაწილდა დემოკრატებსა და რესპუბლიკელებზე.
სენატში დემოკრატებისა და რესპუბლიკელების ლიდერები, ჩაკ შუმერი და მიკ მაკკონელი უნდა შეთანხმდნენ, თუ როგორ გაინაწილებენ ძალაუფლებას.