ეგვიპტის ხელისუფლებამ დედაქალაქ კაიროს სამხრეთით, საქარაში, დიდ ნეკროპოლისში [სამარხთა კომპლექსი] მნიშვნელოვანი არქეოლოგიური აღმოჩენების შესახებ განაცხადა.
გამოცემა The Guardian-ი, ეგვიპტის სიძველეთა დაცვის სამინისტროზე დაყრდნობით, იუწყება, რომ აღმოჩენილია, უძველესი სამარხი და 50-ზე მეტი სარკოფაგი.
სარკოფაგები, რომლებიც მიწის ზედაპირიდან 10-12 მეტრის სიღრმეში აღმოაჩინეს, მიეკუთვნება ეგვიპტის ახალ სამეფოს ერას, რომელიც ძველი წელთაღრიცხვის 1570-1080 წლებში გრძელდებოდა.
ეგვიპტოლოგ ზაჰი ჰავასის განცხადებით, სამარხი ტაძარი ეძღვნება ფარაონ ტეტის მეუღლეს, დედოფალ ნეიტს. სამარხი და სარკოფაგები აღმოაჩინეს პირამიდის მახლობლად, სადაც დაკრძალულია ფარაონი ტეტი, ეგვიპტის მეექვსე დინასტიის პირველი ფარაონი.
საქარა, რომელიც კაიროდან 30 კილომეტრში მდებარეობს, სამარხებისთვის გამოიყენებოდა და ის იყო ეგვიპტის უძველესი დედაქალაქის, მემფისის მთავარი ნეკროპოლისი. საქარა იუნესკოს კულტურული მემკვიდრეობის ძეგლთა ნუსხაშია შესული.
გასული წლის ნოემბერში, ეგვიპტის ხელისუფლებამ 100-ზე მეტი ხელუხლებელი სარკოფაგის აღმოჩენის შესახებ განაცხადა. სარკოფაგები სავარაუდოდ მიეკუთვნება პერიოდს, როდესაც ეგვიპტეს პტოლემეების დინასტია განაგებდა (ძვ.წ. 320-30 წწ.) და გვიანი სამეფოს პერიოდს (ძვ.წ. 664-332 წწ.)