ამერიკელთა 57%-ს სურს, დაუოყოვნებლივ ჩამოშორდეს თანამდებობას რესპუბლიკელი პრეზიდენტი დონალდ ტრამპი, რომლის მოწოდებებმაც უბიძგა ასეულობით მის მხარდამჭერს, შეჭრილიყვნენ კაპიტოლიუმის შენობაში და იერიში მიეტანათ საკანონმდებლო ორგანოზე. ასეთის კვლევის შედეგები, რომელიც საერთაშორისო სააგენტო Reuters-ის დაკვეთით კვლევითმა ორგანიზაცია Ipsos-მა ჩაატარა.
გამოკითხულ ამერიკელთა 70% აცხადებს, რომ ისინი გმობენ პრეზიდენტ ტრამპის მოქმედებებს, რომელიც ოთხშაბათს, კაპიტოლიუმზე შეტევას უძღვოდა წინ. დონალდ ტრამპმა თეთრი სახლის მიმდებარედ საპროტესტო აქციაზე თავის მხარდამჭერებს მოუწოდა, კონგრესისკენ დაძრულიყვნენ, სადაც ჯო ბაიდენის საპრეზიდენტო არჩევნებში გამარჯვების დადასტურება მიმდინარეობდა.
არეულობა კაპიტოლიუმის გორაზე, რასაც ერთი პოლიციელი და კიდევ 4 მოქალაქე ემსხვერპლა, ფართოდ დაიგმო როგორც დემოკრატების, ასევე რესპუბლიკელების მიერ.
გავრცელებული ინფორმაციით, ორშაბათს, წარმომადგენელთა პალატის დემოკრატი წევრები ტრამპის იმპიჩმენტის პროცესის წამოწყებას გეგმავენ.
"თუ პრეზიდენტი ტრამპი თანამდებობას დაუყოვნებლივ არ დატოვებს, კონგრესი იძულებული გახდება იმოქმედოს", - განაცხადა წარმომადგენელთა პალატის სპიკერმა, ნენსი პელოსიმ.
მანამდე, ნენსი პელოსიმ და სენატში დემოკრატების ლიდერმა ჩაკ შუმერმა, ასევე რესპუბლიკელმა კონგრესმენმა ადამ კინზინგერმა მოუწოდეს ვიცე-პრეზიდენტ მაიკ პენსს, აემოქმედებინა ამერიკის კონსტიტუციის 25-ე შესწორება და ტრამპი თანამდებობიდან გადაეყენებინა.
Reuters/Ipsos– ის გამოკითხვა ჩატარდა ინტერნეტით მთელს შეერთებულ შტატებში. გამოიკითხა 1 005 ამერიკელი, რომელთა შორის 339-მა თქვა, რომ არჩევნებში ხმა დონალდ ტრამპს მისცა.