ჯორჯიის შტატში სენატის არჩევნების მეორე ტური გაიმართა.
შტატის ერთ-ერთ ოლქში დემოკრატმა კანდიდატმა რაფაელ უორნოკმა რესპუბლიკელი სენატორი, კელი ლეფლერი დაამარცხა.
ხმების დათვლა ჯერ არ დასრულებულა. წინასწარი მონაცემებით, რაფაელ უორნოკმა ამომრჩეველთა ხმების 50.6% მიიღო, ხოლო კელი ლეფლერმა - 49.4%.
რაფაელ უორნოკი ჯორჯიის შტატის ისტორიაში პირველი შავკანიანი სენატორი გახდება, ამერიკის ისტორიაში კი მე-11 შავკანიანი სენატორი.
მეორე საარჩევნო ოლქში ასევე ლიდერობს დემოკრატი კანდიდატი ჯონ ოსოფი, რომელიც მოქმედ რესპუბლიკელ სენატორს მცირედი უპირატესობით უსწრებს. ჯონ ოსოფმა უკვე გამოაცხადა თავი გამარჯვებულად და თანამოქალაქეებს მხარდაჭერისთვის მადლობა გადაუხადა.
წინასწარი მონაცემებით, ჯონ ოსოფმა ამომრჩეველთა ხმების 50.2% მიიღო, ხოლო დევი პერდიუმ - 49.8%.
რესპუბლიკელ კანდიდატებს დამარცხება ჯერ არ უღიარებიათ.
ამ დროისთვის, სენატში 50 მანდატს რესპუბლიკელები ფლობენ, დემოკრატები კი 48 მანდატს. ამიტომაც სენატში უმრავლესობის მოსაპოვებლად დემოკრატებმა ჯორჯიის შტატის ორივე ოლქში უნდა გაიმარჯვონ. ასეთ შემთხვევაში სენატში მანდატების რაოდენობა თანაბრად განაწილდება (50-50) რესპუბლიკელებსა და დემოკრატებს შორის. ასეთ დროს კი გადამწყვეტი ხმა აქვს ქვეყნის ვიცე-პრეზიდენტს, რომელიც 20 იანვრის შემდეგ დემოკრატი კამალა ჰარისი იქნება.
სენატის არჩევნების პირველი ტური, საპრეზიდენტო არჩევნებთან ერთად, 3 ნოემბერს ჩატარდა. მაშინ გამარჯვებისთვის აუცილებელი, ამომრჩეველთა ხმების 50%-ზე მეტი ვერცერთმა კანდიდატმა მიიღო.