გერმანია აგრძელებს ლოკდაუნის რეჟიმში ყოფნას თვის ბოლომდე და აწესებს კიდევ უფრო მკაცრ შეზღუდვებს, კორონავირუსის გავრცელების აღსაკვეთად. ამის შესახებ გერმანიის კანცლერმა ანგელა მერკელმა განაცხადა.
"ჩვენ უფრო მკაცრად უნდა შევზღუდოთ კონტაქტები... ყველა მოქალაქეს ვთხოვთ, შეზღუდეთ კონტაქტები აბსოლუტურ მინიმუმამდე", - განუცხადა მერკელმა ჟურნალისტებს გერმანიის 16 ფედერალური მიწის ლიდერებთან შეხვედრის შემდეგ.
კორონავირუსის დაზარალებულ რეგიონებში მცხოვრებ მოქალაქეებს მხოლოდ 15 კილომეტრამდე რადიუსის ფარგლებში შეეძლებათ გადაადგილება.
მაღაზიები და რესტორნები კვლავ დახურული იქნება. სკოლებში სწავლა ონლაინ რეჟიმში გაგრძელდება.
"ჩვენ მიგვაჩნია, რომ ეს ზომები გამართლებულია, რაოდენ მძიმეც უნდა იყოს", - თქვა მერკელმა.
კანცლერის თქმით, ის და ფედერალური მიწების ლიდერები 25 იანვარს გადახედავენ შეზღუდვების მიზანშეწონილობის საკითხს.
პანდემიის დაწყებიდან დღემდე, გერმანიაში კორონავირუსის 1 787 410 შემთხვევა გამოვლინდა, ხოლო 35 518 ადამიანი გარდაიცვალა.
გერმანიამ ნაწილობრივი ლოკდაუნი ნოემბერში გამოაცხადა, მაგრამ დეკემბრის შუა რიცხვებში იძულებული გახდა შეზღუდვები კიდევ უფრო გაემკაცრებინა, რადგან მან ვერ გამოიღო სასურველი შედეგები.