დიდ ბრიტანეთში კორონავირუსის რეკორდული რაოდენობა გამოვლინდა. ბოლო 24 საათში, ქვეყანაში COVID-19-ით კიდევ 60 916 ადამიანი დაინფიცირდა.
ეს რეკორდული მაჩვენებელია პანდემიის დაწყებიდან. წინა რეკორდი - 58 784 ინფიცირებული, გუშინ, 4 იანვარს დაფიქსირდა.
ბოლო 24 საათში, Covid-19-ით 830 ადამიანი გარდაიცვალა. ბრიტანეთში ბოლო მონაცემებით კორონავირუსით გარდაცვლილია 76 ათასზე მეტი ადამიანი.
შეგახსენებთ, 5 იანვრიდან ინგლისში საყოველთაო კარანტინი გამოცხადდა.
საყოველთაო კარანტინის დაწესება განპირობებულია კორონავირუსის ახალი შტამით, რომელიც პრემიერ-მინისტრ ჯონსონის თქმით, "საშინელი სისწრაფით ვრცელდება".
რას გულისხმობს საყოველთაო კარანტინი
• ადამიანები უნდა დარჩნენ სახლში. გამონაკლისია გადაადგილება: აუცილებელი საჭიროების, განათლების, სამუშაო ადგილზე მისვლისა და დღეში ერთხელ ვარჯიშის მიზნით;
• სტუმართმოყვარეობის სექტორი დახურულია;
• ახლიდან მუშაობა, სადაც ეს შესაძლებელია;
• ყველა სახის სავაჭრო ობიექტი, გამაჯანსაღებელი და გასართობი ცენტრი დახურულია;
• საგანმანათლებლო დაწესებულებები და სკოლები გადადიან ონლაინ სწავლების რეჟიმში თებერვლის შუა რიცხვებამდე. გამონაკლისის სახით, სკოლები ღია იქნება მხოლოდ განსაკუთრებული პროფესიის მქონე (critical workers) ადამიანების შვილებისთვის.
პრემიერმა ჯონსონმა ასევე აღნიშნა, რომ ქვეყანაში მიმდინარეობს საყოველთაო ვაქცინაცია ბრიტანეთში დამტკიცებული 2 ვაქცინის (კომპანიების Pfizer და AstraZeneca-Oxford) გამოყენებით. წარმატებულ ვაქცინაციაზე და მოსახლეობის მიერ მთავრობის რეკომენდაციების დაცვაზე იქნება დამოკიდებული თებერვლის შუა რიცხვებამდე დაწესებული შეზღუდვების შემსუბუქება.
ჯონსონის მიერ გამოცხადებული საყოველთაო კარანტინი ინგლისზე ვრცელდება, რადგან გაერთიანებული სამეფოს სხვა ნაწილებში, კორონავირუსის წინააღმდეგ ბრძოლას ადგილობრივი ხელისუფლება არეგულირებს.
მანამდე შოტლანდიის პირველმა მინისტრმა, ნიკოლა სტარჯონმა განაცხადა მკაცრი ლოკდაუნის დაწესების შესახებ.