ამერიკულმა გამოცემამ Washington Post-მა გამოაქვეყნა სატელეფონო ჩანაწერი, სადაც აშშ-ის მოქმედი პრეზიდენტი დონალდ ტრამპი ჯორჯიის შტატის სახელმწიფო მდივანს, ბრედ რაფენსპერგერს "საკმარისი რაოდენობის ხმების პოვნას" სთხოვს, რათა არჩევნებში მისი გამარჯვება დამტკიცდეს.
"მე მხოლოდ მინდა 11 780 ხმის პოვნა", - მიმართავს ტრამპი ჯორჯიის შტატის რესპუბლიკელ სახელმწიფო მდივანს, ბრედ რაფენსპერგერს სატელეფონო ჩანაწერში.
საპასუხოდ, ბრედ რაფენსპერგერი ამბობს, რომ ჯორჯიის შტატის არჩევნების შედეგები სწორია.
სატელეფონო საუბრისას დონალდ ტრამპი დაჟინებით აცხადებს, რომ ჯორჯიის შტატში მან მოიგო და მოუწოდებს სახელმწიფო მდივანს, მოითხოვოს ხმების ხელახალი გადათვლა.
"გამოწვევა, რომელიც თქვენს წინაშეა, ბატონო პრეზიდენტო, არის ის, რომ თქვენი მონაცემები არასწორია", - პასუხობს დონალდ ტრამპს რაფენსპერგერი ჩანაწერში.
სატელეფონო ჩანაწერში დონალდ ტრამპი რაფენსპერგერს შესაძლო სამართლებრივ პასუხისმგებლობაზე მიანიშნებს.
"თქვენ იცით, თუ რა ჩაიდინეს მათ და ამას არ ამჟღავნებთ. ეს სისხლის სამართლის დანაშაულია. არ შეგიძლიათ ეს დაუშვათ. ეს დიდი რისკია თქვენთვის", - განაცხადა აშშ-ის პრეზიდენტმა.
თეთრ სახლს აუდიოჩანაწერთან დაკავშირებით ოფიციალური კომენტარი არ გაუკეთებია.
ჯორჯიის შტატში ჯო ბაიდენმა გაიმარჯვა.
3 ნოემბერის არჩევნების შემდეგ, ტრამპი არ წყვეტს დაუსაბუთებელი ბრალდებების გაჟღერებას იმის შესახებ, რომ მას არჩევნები მოპარეს.
50-ვე შტატმა უკვე დაამოწმა არჩევნების შედეგები, შეიკრიბა საარჩევნო კოლეგიაც და დაადასტურა ჯო ბაიდენის გამარჯვება.
კონგრესი ოფიციალურად დაამტკიცებს არჩევნების შედეგებს 6 იანვარს, ხოლო ჯო ბაიდენი, პრეზიდენტის მოვალეობის შესრულებას 20 იანვრიდან შეუდგება, მას შემდეგ, რაც გაიმართება მისი ინაუგურაცია.