98 წლის დიზაინერი პიერ კარდენი გარდაიცვალა. ინფორმაციას ფრანგული მედია დიზაინერის ოჯახზე დაყრდნობით ავრცელებს.
პიერ კარდენი ღარიბი იტალიელი ემიგრანტების შვილი იყო. ის ვენეციის მახლობლად, დიდ ღარიბ ოჯახში მეექვსე შვილად დაიბადა. როდესაც პიერი ორი წლის იყო, ოჯახი საცხოვრებლად საფრანგეთში გადავიდა. 14 წლის ასაკში ის მამაკაცის ტანსაცმლის მკერავის მოწაფე გახდა. თეატრზე ოცნებამ ის პარიზამდე ჩაიყვანა, თუმცა მოდამ, საბოლოოდ, გაიმარჯვა.
40-იანი წლების ბოლოდან მუშაობდა კრისტიან დიორის ატელიეში, რამდენიმე წლის შემდეგ შექმნა საკუთარი მოდის სახლი, მოგვიანებით კი პარიზის ავეჯის ბუტიკი.
პიერ კარდენს პაკო რაბანთან ერთად უდიდესი წვლილი მიუძღვის ომის შემდგომ საფრანგეთში მაღალი მოდის აღორძინებაში.