ევროკავშირი მოითხოვს, დაუყოვნებლივ გათავისუფლდეს ჩინელი ჟურნალისტი ჟანგ ჟანი, რომელიც უხანში კორონავირუსის ეპიდემიის აფეთქების გაშუქებისთვის ჩინეთის კომუნისტურმა რეჟიმმა დააკავა.
"შეზღუდვები გამოხატვის თავისუფლებაზე, ინფორმაციის ხელმისაწვდომობაზე, ჟურნალისტებზე ზეწოლაზე, მათზე დაკვირვება და მეთვალყურეობა ჩინეთში იზრდება და კვლავ დიდ შეშფოთებას იწვევს", - ნათქვამია ევროკავშირის განცხადებაში.
ევროკავშირი შეშფოთებას გამოთქვამს ჟურნალისტის მიმართ სავარაუდო არასათანადო მოპყრობაზე.
"სანდო წყაროების თანახმად, ქალბატონი ჟანგი დაკავების დროს განიცდიდა წამებას, არასათანადო მოპყრობას, რის შედეგადაც მისი ჯანმრთელობის მდგომარეობა სერიოზულად გაუარესდა. გადამწყვეტი მნიშვნელობა აქვს, რომ მან მიიღოს სათანადო სამედიცინო დახმარება", - ვკითხულობთ ევროკავშირის მიერ გავრცელებულ განცხადებაში.
ევროკავშირი ასევე მოუწოდებს ჩინეთის ხელისუფლებას, დაუყოვნებლივ გაათავისუფლოს სხვა დაკავებულები, რომელთა საქმიანობაც საზოგადოებრივ ინტერესებს ემსახურებოდა.
ჟანგ ჟანი უხანში კორონავირუსის ეპიდემიის აფეთქებიდან მალევე ჩავიდა და ამ საკითხის გაშუქება დაიწყო, ვინაიდან ჩინეთში მედია დიდწილად სახელისუფლებო გავლენის ქვეშ იმყოფება, არ არსებობდა ალტერნატიული წყარო მოსახლეობის საშიში ვირუსის შესახებ ინფორმირებისთვის.
დამოუკიდებელი ჟურნალისტი უხანიდან სოციალურ ქსელებში - Wechat, Twitter, Youtube - აქვეყნებდა ფოტოებს, ვიდეოებსა და ბლოგებს, სადაც ის ვირუსის შესახებ იტყობინებოდა
ჟანგ ჟანს შანხაის სასამართლომ 4 წლით თავისუფლების აღკვეთა მიუსაჯა. ჟურნალისტს "უთანხმოებისა და პრობლემების პროვოცირებაში" დებენ ბრალს.
ჟანი ერთ-ერთია იმ მრავალი დამოუკიდებელი ჟურნალისტიდან, რომელიც იმავე ბრალდებით უხანში მიმდინარე ამბების გაშუქების გამო დააკავეს.
