ევროკავშირის წევრი სახელმწიფოების ელჩებმა ერთხმად დაუჭირეს მხარი ევროკავშირსა და დიდ ბრიტანეთს შორის ბრექსიტის შემდგომ სავაჭრო ურთიერთობების შეთანხმებას.
შეთანხმება კანონის ძალას სავარაუდოდ მომავალი წლის დასაწყისისთვის მიიღებს, ვინაიდან ოთხშაბათს მას დაამტკიცებს გაერთიანებული სამეფოს პარლამენტი.
ევროკავშირის წესების მიხედვით, ვიდრე შეთანხმებას ევროპარლამენტი დაამტკიცებს, მას დროებითი მოქმედება ექნება. მოელიან, რომ ევროპის პარლამენტი მომავალი წლის იანვარში უყრის კენჭს შეთანხმების ტექსტს.
სავაჭრო შეთანხმება განსაზღვრავს ბრიტანეთისა და ევროგაერთიანების სამომავლო ურთიერთობების ჩარჩოებს, მას შემდეგ, რაც 31 დეკემბერს გაერთიანებული სამეფო დატოვებს ევროკავშირის ერთიან ბაზარსა და საბაჟო კავშირს.
სავაჭრო შეთანხმების მიღწევით დასრულდა ბრიტანეთის ევროკავშირის 50-წლიანი წევრობა.
თითქმის ერთწლიანი მოლაპარაკებების შემდეგ, სავაჭრო შეთანხმება ევროკავშირსა და ბრიტანეთს შორის 24 დეკემბერს იქნა მიღწეული.
რას გულისხმობს სავაჭრო შეთანხმება:
საშუალებას აძლევს დიდ ბრიტანეთის გააგრძელოს საქონლის რეალიზაცია ევროკავშირის ბაზარზე ტარიფებისა და კვოტების გარეშე;
შეთანხმება მოიცავს აღსრულებისა და დავების მოგვარების მექანიზმებს უსამართლო კონკურენციის მოსაგვარებლად, რასაც ევროკავშირი "თანაბარი პირობების" წესებს უწოდებს;
უზრუნველყოფს დიდ ბრიტანეთსა და ევროკავშირს შორის შეუფერხებელი სატრანსპორტო კავშირების გაგრძელებას, მათ შორის სამგზავრო უფლებების დაცვის გარანტიებს;
იგი ასევე გულისხმობს ახალ სამართლებრვი გარემოს და სხვა ბარიერებს ბრიტანული ბიზნესისთვის ევროკავშირში;
ხუთწელნახევრიან გარადმავალ პერიოდში, ევროკავშირის ქვეყნების მიერ ბრიტანულ წყლებში თევზჭერის 25% გადაეცემა ბრიტანულ ფლოტს;
ამცირებს გაერთიანებული სამეფოს ხელმისაწვდომობას ევროკავშირის პროგრამებზე სხვადასხვა სფეროში, მათ შორის პოლიციისა და განათლების სფეროში.