შეერთებული შტატების პრეზიდენტმა, დონალდ ტრამპმა ხელი მოაწერა 2021 წლის ბიუჯეტის კანონპროექტს, რომელიც ასევე მოიცავს კორონავირუსის გამო ეკონომიკის სტიმულირების 900-მილიარდიან პაკეტს.
კანონპროექტის ხელმოწერით თავიდან იქნა აცილებული ფედერალური მთავრობის ნაწილობრივი დახურვა, როგორც ეს მოსალოდნელი იყო, რადგან ტრამპი სტიმულირების პაკეტის რამდენიმე ნაწილს აკრიტიკებდა და ხელმოწერას აჭიანურებდა.
სტიმულირების პაკეტი, უმუშევრობის კომპენსაციის სახით, 600-დოლარიან დახმარებას ითვალისწინებდა, რაზეც ტრამპი აცხადებდა, რომ საკმარისი არ იყო და კომპენსაციის 2000 დოლარამდე გაზრდას ითხოვდა.
კონგრესში ტრამპის კრიტიკა და ხელმოწერის გაჭიანურება გასაკვირი აღმოჩნდა, რადგან ორპარტიული თანხმობით მიღებულ კანონპროექტთან დაკავშირებით თეთრი სახლიდან მიღებული ჰქონდათ თანხმობა, რომ პრეზიდენტის ხელმოწერა უზრუნველყოფილი იქნებოდა.
გავრცელებული ცნობით, მოლაპარაკებები უმუშევრობის კომპენსაციის 2000 დოლარამდე გაზრდასთან დაკავშირებით გაგრძელდება. დემოკრატებმა უკვე გამოთქვეს მზაობა.
რამდენიმეთვიანი უთანხმოების შემდეგ, გასულ კვირას კონგრესის დემოკრატმა და რესპუბლიკელმა წევრებმა შეთანხმებას მიაღწიეს ეკონომიკის სტიმულირების 900-მილიარდიანი პაკეტის შესახებ.
მანამდე კონგრესის ორივე პალატამ პანდემიით დაზარალებული ეკონომიკის სტიმულირებისთვის ორი ფინანსური პაკეტი დაამტკიცა.
ახალი ფინანსური პაკეტით, უმუშევრობის კომპენსაციის სახით მოქალაქეებისთვის გათვალისწინებულია დამატებით ყოველკვირეული 300 დოლარის გადახდა. ასევე 600 დოლარის ოდენობის პირდაპირი ფულადი დახმარება სხვადასხვა კატეგორიის მოქალაქეებისთვის.
ფინანსური პაკეტი მოიცავს ფულად დახმარებებს ბიზნესის, სკოლებისა და სამედიცინო მომსახურების მიმწოდებლებისთვის. ასევე მოიჯარეებისთვის, რომლებიც ქირის გადასახადის გადაუხდელობის გამო გამოსახლების საფრთხის წინაშე დგანან.
325 მილიარდი გამოიყოფა მცირე ბიზნესის დასახმარებლად, 15 მილიარდი დოლარი კი ავიაკომპანიების სუბსიდირებისთვის.
გარდა ამისა, დოკუმენტში აღნიშნულია, რომ 69 მილიარდი დოლარი გამოიყო COVID-19–ის საწინააღმდეგო ვაქცინების განაწილებისთვის, მოსახლეობის კორონავირუსის ტესტირებისა და ინფიცირებული ადამიანების კონტაქტების მოძიებისთვის.
ამ დროისთვის, ფედერალურმა მთავრობამ პანდემიით დაზარალებული ეკონომიკის სტიმულირებისთვის 6 ტრილიონზე მეტი დოლარი გამოყო.
