ძველ რომაულ ქალაქ პომპეიში, რომელიც თითქმის 2000 წლის წინ, ვულკან ვეზუვის ამოფრქვევის შედეგად განადგურდა, არქეოლოგებმა "სწრაფი კვების" ობიექტი აღმოაჩინეს.
ამ ადგილას, რომელიც თერმოპოლიუმის სახელით არის ცნობილი, საუკუნეების წინ, პომპეის მოქალაქეები ცხელ კერძებსა და სასმელებს მიირთმევდნენ.
სავაჭრო სივრცე ულამაზესი ნახატებითაა დამშვენებული. აღმოჩენილია ასევე თიხის ჭურჭელი, რომელშიც სხვადასხვა საკვებს ინახავდნენ. ამ ჭურჭელში მკვლევარებმა ღორის, თევზის, ლოკოკინებისა და ძროხის ხორცის ნაკვალევი აღმოაჩინეს.
პომპეი ქალაქ ჰერკულანუმთან ერთად ახალი წელთაღრიცხვის 79 წელს ვულკან ვეზუვის ამოფრქვევის შემდეგ განადგურდა.
საუკუნეების მანძილზე ვულკანური ფერფლით იყო დაფარული. მდებარეობს იტალიაში თანამედროვე ნეაპოლთან ახლოს.
ქალაქი აღმოაჩინეს 1748 წელს. მას შემდეგ, როგორც ანტიკური ქალაქის ყველაზე უკეთ შენახული ნანგრევები, ანტიკური სამყაროს შესწავლის უმნიშვნელოვანესი წყაროს წარმოადგენს.
1997 წელს, ქალაქის ნაშთები ჰერკულანუმთან ერთად, იუნესკომ მსოფლიო მემკვიდრეობის სიაში შეიტანა.