სახელგანთქმული მომღერალი სელინ დიონი, სემ ჰეუგენს და პრიანკა ჩოპრასთან ერთად რომანტიკულ დრამაში - Text for You/შეტყობინება შენთვის - ითამაშებს. იუწყება Variety.
ახალი კინოსურათი გერმანულენოვანი SMS Fur Dich-ის რიმეიქია, რომელიც სოფი კრამერის რომანის მიხედვით არის გადაღებული.
ფილმი მოგვითხრობს გოგოზე, რომლის საქმრო ტრაგიკულად იღუპება. ცოტა ხნის შემდეგ, გოგო იწყებს რომანტიკული შეტყობინებების გაგზავნას მისი მობილური ტელეფონის ნომერზე. აღმოჩნდება, რომ ახლა ეს ნომერი ეკუთვნის კაცს, რომელიც ქალაქის სხვა მხარეს ცხოვრობს და ისიც გულგატეხილია. ისინი ხვდებიან ერთმანეთს და გრძნობენ, რომ მათ შორის რაღაც კავშირი არსებობს, თუმცა წარსული არ აძლევთ სიყვარულის საშუალებას. სელინ დიონის მუსიკა მათ კვლავ დააჯერებს სიყვარულის არსებობას.
ფილმის რეჟისორი და სცენარის ავტორია ჯიმ სტრაუსი.
ფილმის ტელეკრანებზე გამოსვლის თარიღი ჯერჯერობით უცნობია.
