კომპანია YouTube-მა განაცხადა, რომ ვიდეოპლატფორმიდან ამოიღებს ვიდეოებს, რომლებიც კორონავირუსის ვაქცინის შესახებ დეზინფორმაციულ შინაარს შეიცავს.
ამავე დროს, Youtube გააფართოვებს უკვე მოქმედ წესებს ყალბი ამბებისა და კორონავირუსის პანდემიის შესახებ შეთქმულების თეორიების აღსაკვეთად.
კომპანიის განცხადების თანახმად, აიკრძალება კორონავირუსის ვაქცინის შესახებ ნებისმიერი ვიდეო, რომლის შინაარსი ეწინააღმდეგება ადგილობრივი სამედიცინო ინსტიტუტებისა და ჯანმრთელობის მსოფლიო ორგანიზაციის შეხედულებებს.
გავრცელებულ განცხადებაში ვკითხულობთ, რომ ამიერიდან პლატფორმის მომხმარებელი ვეღარ ნახავს ვიდეოს, სადაც ნათქვამია, რომ "ვაქცინა კლავს, ან იწვევს უნაყოფობას, ვაქცინაციის დროს ადამიანთა სხეულებში მიკროჩიპებს ნერგავენ და ა.შ."
როგორც Youtube იუწყება, თებერვლის დასაწყისიდან დღემდე პლატფორმიდან 200 000-ზე მეტი ასეთი შინაარსის ვიდეო ამოიღო.
მოგვიანებით, Youtube-ის პრესსპიკერმა Reuters-თან საუბრისას განმარტა, რომ ვიდეოები, რომლებიც ვაქცინის შესახებ ზოგადი დისკუსიის შინაარსს შეიცავენ, პლატფორმაზე კვლავ დარჩება.
კორონავირუსის ვაქცინასთან დაკავშირებული დეზინფორმაცია და შეთქმულების თეორიები სხვადასხვა სოციალურ ქსელში პანდემიის დაწყებიდან მალევე გავრცელდა. დეზინფორმაციის აღსაკვეთად სხვადასხვა სოციალურმა ქსელმა გადამჭრელი ზომები მიიღო, მათ შორის Facebook-მა, Twitter-მა და Instagram-მა.