ბოლო 8 წელი მართლაც გამორჩეული იყო, როგორც ქედისთვის, ისე, ჩვენი ქვეყნისთვის. უნდა გავაგრძელოთ ღირსეული, სამართლიანი სახელმწიფოს შენება, რომელსაც 2012 წელს საფუძველი დაუდო ჩვენი პარტიის ლიდერმა ბიძინა ივანიშვილმა - ამის შესახებ განაცხადა აჭარის მთავრობის თავმჯდომარემ თორნიკე რიჟვაძემ ქედაში, ხულოს, შუახევის ქედისა და ხელვაჩაურის მაჟორიტარი დეპუტატობის კანდიდატის ანზორ ბოლქვაძისა და აჭარის ავტონომიური რესპუბლიკის უმაღლესი საბჭოს დეპუტატობის კანდიდატ ფრიდონ ფუტკარაძის წარდგენისას.
თორნიკე რიჟვაძის განცხადებით განსაკუთრებით მნიშვნელოვანია, რომ განვითარება და აღმშენებლობა იგრძნობოდეს ყველგან, როგორც ქალაქში, ასევე, სოფლად.
„ჩვენთვის დიდი პატივია დღეს შეგხვდეთ თქვენ და კიდევ ერთხელ გითხრათ, რომ უახლოეს არჩევნებში კიდევ ერთხელ გვაქვს თქვენი იმედი. ქედა ყოველთვის იყო გამორჩეული, პირველ რიგში ქედელებით, თავისი შრომისმოყვარეობით, მუყაითობით და ყოველთვის ჩვენ ვიყავით ამაყი იმ შედეგებით, რომელიც გვქონდა ქედაში.
განსაკუთრებით მნიშვნელოვანია, რომ სოფლის მეურნეობას, ეკოტურიზმს ახალი დინამიკა, ახალი განვითარება მიეცა. იცით, რომ წელს პრაქტიკულად როგორც ქედაში, ასევე, მთლიანად აჭარაში და მთელს ქვეყანაში არ დარჩენილა არცერთი სასოფლო-სამეურნეო დანიშნულების მიწის ნაკვეთი, რომელიც არ დამუშავებულა. რა თქმა უნდა ეს არის წინა პირობა მეტი განვითარების, მეტი ეკონომიკის ადგილზე და ეს არის საშუალება კიდევ უფრო მეტი კეთილდღეობა ჰქონდეს თითოეულ ქედელ გლეხს, ფერმერს. ჩვენთვის მნიშვნელოვანია ტურიზმი კიდევ უფრო მეტად, კიდევ უფრო დინამიურად განვავითაროთ, ასევე, მნიშვნელოვანია მეღვინეობის განვითარება, სახელმწიფო პროგრამა, რომელიც მოქმედებს მნიშვნელოვნად დაეხმარება ღვინის წარმოებას ახალი საფეხური ჰქონდეს ამ ლამაზ მუნიციპალიტეტში" - განაცხადა თორნიკე რიჟვაძემ.
მთავრობის თავმჯდომარემ მადლობა გადაუხადა ქედის მაცხოვრებლებს გვერდში დგომისთვის - „მინდა მადლობა გადაგიხადოთ იმ გვერდში დგომისთვის, რომელსაც ყოველთვის ვგრძნობდით და დარწმუნებული ვარ, რომ ჩვენი წარმოდგენილი კანდიდატები დაიმსახურებენ თქვენს ნდობას და ჩვენ კიდევ ერთხელ გავიმარჯვებთ ჩვენი ქვეყნის წარმატებისთვის, ჩვენი აჭარის წარმატებისთვის, და რა თქმა უნდა ქედის წარმატებისთვის“, განაცხადა რიჟვაძემ.
