ყველა ოპოზიციური პარტია დაირაზმება არჩევნების გაყალბების წინააღმდეგ. ასე ეხმიანება "დემოკრატიული მოძრაობა - ერთიანი საქართველოს" ლიდერი, ნინო ბურჯანაძე ოპოზიციური პარტიების მიერ ერთობლივი დეკლარაციის ხელმოწერას.
მისი თქმით, ერთობლივი დეკლარაცია არის ზუსტად არეულობის, რევოლუციის საწინააღმდეგო სცენარი, რომ პარტიებმა კოორდინირებულად იმოქმედონ და გაყალბება გამოირიცხოს.
"ნამდვილად ისტორიული დღეა საქართველოს პოლიტიკურ ცხოვრებაში, ეს არ არის გადაჭარბებული შეფასება. მსგავსი მოვლენა, როდესაც აბსოლიტურად ყველა მიმართულების პოლიტიკური ორგანიზაცია დავსხედით და გადავწყვიტეთ, რომ არავის მივცეთ უფლება, 2020 წლის არჩევნების გაყალბების და მანიპულირების, პრაქტიკულად, ქვეყნის პოლიტიკურ ცხოვრებაში არ მომხდარა. ეს ნამდვილად არის სიგნალი ხელისუფლებისათვის, რომ არ გაბედოს არჩევნების გაყალბება, წინააღმდეგ შემთხვევაში ყველა ოპოზიციური პარტია დაირაზმება არჩევნების გაყალბების წინააღმდეგ. აქ ვეღარ მოხერხდება ის რაც 2016 წელს შეძლო ბიძინა ივანიშვილმა", - განაცხადა ბურჯანაძემ.
შეგახსენებთ, ოპოზიციურმა პარტიებმა ხელი მოაწერეს მემორანდუმს, რომელიც არჩევნებში ერთმანეთის ხმების დაცვას ითვალისწინებს.
