საქართველოს პარლამენტის ვიცე-სპიკერი გია ვოლსკი ირწმუნება, რომ "ქართულ ოცნებას" არჩევნებში გამარჯვებისა და მთავრობის დაკომპლექტების რესურსი აქვს.
მისივე განცხადებით, "ქართული ოცნება" ამ ეტაპზე რომელიმე პოლიტიკურ ძალასთან წინასაარჩევნოდ თანამშრომლობას არ განიხილავს.
"ამ ეტაპზე არავისთან, არც „პატრიოტთა ალიანსთან“, არც ნებისმიერ სხვა პოლიტიკურ პარტიასთან არ განიხილება თანამშრომლობა. არამგონია, "პატრიოტთა ალიანსმა" საგარეო პოლიტიკაზე საკუთარი შეხედულებები შეცვალოს, რასაც ჩვენ არათუ კატეგორიულად არ ვეთანხმებით, არამედ ვფიქრობთ, რომ ქვეყნისთვის ეს პოზიცია დამაზიანებელია. არჩევნების შემდეგ ვიმსჯელებთ ნებისმიერ პარტიასთან, რომელსაც ექნება კონკრეტული ხედვა ქვეყნის განვითარების საკითხებთან დაკავშირებით. შეიძლება, მოვუსმინოთ, მათი აზრი გავითვალისწინოთ და პარლამენტიც სწორედ ამას ნიშნავს", - განაცხადა გია ვოლსკიმ.
