შეერთებული შტატების კონგრესის წარმომადგენელთა პალატამ მხარი დაუჭირა აქტს 2021 ფისკალური წლის საგარეო ოპერაციების დაფინანსების შესახებ, სადაც საქართველოსთვის გამოყოფილი დახმარების შესაძლო შემცირებაზეც არის საუბარი.
აღნიშნულია, რომ მომავალ წელს საქართველო ამერიკის შეერთებული შტატებისგან სულ მცირე 132 025 000 აშშ დოლარს მიიღებს, თუმცა ამ თანხის 15% შესაძლოა შეჩერდეს, ვიდრე წარმომადგენელთა პალატას არ წარედგინება სახელმწიფო მდივნის მოხსენება, სადაც დადასტურებული იქნება საქართველოს მთავრობის ქმედითი ნაბიჯები დემოკრატიის გაძლიერების მიმართულებით.
"ამ კანონპროექტით გამოყოფილი თანხის 15%-ის გაცემა არ შეიძლება იყოს სავალდებულო, ვიდრე სახელმწიფო მდივანი არ დაადგენს, რომ საქართველოს ცენტრალური ხელისუფლება ქმედით ნაბიჯებს დგამს:
ა) დემოკრატიული ინსტიტუტების გაძლიერების მიმართულებით;
ბ) მთავრობაში კორუფციის წინააღმდეგ ბრძოლის, მათ შორის ანტიკორუფციული კანონებისა და რეგულაციების გამოყენების მიმართულებით;
გ) კერძო სექტორში კანონის უზენაესობისა და საერთაშორისო სტანდარტებთან შესაბამისობის უზრუნველსაყოფად, რაც გულისხმობს უცხოური ბიზნესის თავისუფალ, შევირწორების გარეშე საქმიანობას, რათა სრულად შეძლონ კომერციული და ფინანსური სარგებლის მიღება, რასაც საქართველოში განხორციელებული ინვესტიციები მოუტანს;
დ) მთავრობის ფუნქციონირებასა და კანონებისა და რეგულაციების გამოყენებაზე ოლიგარქების არაფორმალური გავლენის შეზღუდვა", - ნათქვამია კანონპროექტში.
წარმომადგენელთამ პალატის მიერ დამტკიცებულ აქტში აღნიშნულია, რომ დაფინანსების შეჩერება არ გავრცელდება იმ პროგრამებზე, რომლებიც მიმართულია საქართველოში დემოკრატიის გაძლიერების, კანონის უზენაესობის, სამოქალაქო საზოგადოებისა და მედიის განვითარებისა და ქალთა მიმართ ძალადობის შემცირებისკენ.
განმარტებით ბარათში, რომელიც თან ერთვის აქტს, ნათქვამია, რომ კომიტეტი მიესალმება საქართველოში საკონსტიტუციო ცვლილებების მიღებას, რომელიც ხელს უწყობს პროპორციული წარმომადგენლობითი სისტემის შექმნას.
კანონპროექტის მიხედვით კონგრესი კვლავ კრძალავს დახმარების გაწევას იმ ქვეყნებისთვის, რომლებიც რუსეთის მიერ ოკუპირებული აფხაზეთისა და ცხინვალის რეგიონის დამოუკიდებლობას აღიარებს ან მათთან დიპლომატიური კავშირები აქვს.
ვიდრე აქტს წარმომადგენელთა პალატა დაამტკიცებდა, მანამდე მას მხარი ჯერ სიგნებების კომიტეტის ქვეკომიტეტმა, მოგვიანებით კი აშშ-ის კონგრესის წარმომადგენელთა პალატის ასიგნებების კომიტეტმა დაუჭირა.