"ლეიბორისტული პარტიის ლიდერი შალვა ნათელაშვილი "ქართული ოცნების" მიერ მაჟორიტარი დეპუტატობის კანდიდატების წარდგენას გამოეხმაურა.
ნათელაშვილის განცხადებით, დღევანდელმა ღონისძიებამ ნათლად აჩვენა, რომ მმართველი პარტიის საქმე დამთავრებულია.
"დღეს კოჯრის ტყეში გამართულმა პანაშვიდის მსგავსმა სამთავრობო თავყრილობამ, რომელსაც აკლდა ბეთჰოვენის სამგლოვიარო მარში და "თავო ჩემო", კიდევ ერთხელ ნათლად აჩვენა, რომ მმართველი პარტიის საქმე დამთავრებულია. ამავდროულად კიდევ ერთხელ დადასტურდა ძველი ქართული სიბრძნე, რომ "არ განემართების ძაღლის კუდი და არცა კირჩხიბი მართლად ვლის". მმართველ გუნდს აღარ შეუძლია განახლება, ამას ადასტურებს წარმოდგენილი მაჟორიტარი კანდიდატები, სადაც მთელი თანავარსკვლავედია თაღლითების, ზონდერების ოლიგარქების, მლიქვნელების, მტაცებლების, კორუმპირებულების", - განაცხადა ნათელაშვილმა.
შეგახსენებთ, "ქართულმა ოცნებამ" მაჟორიტარი დეპუტატობის კანდიდატები დღეს წარადგინა.
თბილისში ქართული ოცნების მაჟორიტარობის კანდიდატები იხილეთ აქ.
"ქართული ოცნების“ მაჟორიტარობის კანდიდატები რეგიონებში იხილეთ აქ.
