"დემოკრატიული მოძრაობა - ერთიანი საქართველოს" ლიდერი ნინო ბურჯანაძე "ქართული ოცნების" მიერ მაჟორიტარი დეპუტატობის კანდიდატების წარდგენას გამოეხმაურა.
როგორც ნინო ბურჯანაძე აცხადებს, ბიძინა ივანიშვილს საკუთარი მოსახლეობა მხოლოდ არჩევნების წინ ახსენდება
"პანდემიის პიკშიც კი არ მოგსვლიათ თავში აზრად, რომ ადამიანებს დალაპარაკებოდით და გაგემხნევებინათ. მხოლოდ და მხოლოდ არჩევნების დროს გახსენდებათ საკუთარი მოსახლეობა და არჩევნების დროს გასცემთ ხოლმე დაპირებებს, რომელსაც როგორც წესი არ ასრულებთ", - მიმართა ნინო ბურჯანაძემ ბიძინა ივანიშვილს.
ნინო ბურჯანაძემ ასევე აღნიშნა, რომ გაკვირვებულია, თუ რატომ ესწრებოდნენ მაჟორიტარობის კანდიდატების წარდგენას ეპიდემიოლოგები.
"დიდი პატივისცემით მივმართავ იმ ადამიანებს, ვინც მართლაც ამ კორონავირუსთან ბრძოლის დროს, ძალიან სერიოზულად ედგა მხარში საქართველოს მთავრობასაც, მოსახლეობასაც. მე ექიმები მყავს მხედველობაში და ეპიდემიოლოგები. მაგრამ მაინტერესებს, რა ესაქმება ეპიდემიისა და პანდემიის დროს ეპიდემიოლოგებს მმართველი გუნდის მაჟორიტარი დეპუტატების წარდგენაზე. რომელი სახელმწიფო გინახავთ, სადაც მმართველ გუნდი საპარლამენტო სიის ან მაჟორიტარების წარდგენის დროს ეპიდემიოლოგ ექიმებს იწვევდეს ამ წარდგენაზე.
ჩვენ ვართ ასეთი ქვეყანა, ერთადერთი ქვეყანა იმიტომ, რომ ქართული ოცნება, ბიძინა ივანიშვილი და დღევანდელი ხელისუფლება ამ ადამიანების ზურგს უკან და პანდემიის ქოლგის ქვეშ აპირებენ არჩევნების ჩატარებას", - განაცხადა ბურჯანაძემ.
შეგახსენებთ, "ქართულმა ოცნებამ" მაჟორიტარი დეპუტატობის კანდიდატები დღეს წარადგინა, რომელსაც ასევე ესწრებოდნენ ექიმები და ეპიდემიოლოგები, ლევან რატიანი, ამირან გამყრელიძე და პაატა იმნაძე.
თბილისში ქართული ოცნების მაჟორიტარობის კანდიდატები იხილეთ აქ.
"ქართული ოცნების“ მაჟორიტარობის კანდიდატები რეგიონებში იხილეთ აქ.
