"ლეიბორისტული პარტიის" ლიდერი, შალვა ნათელაშვილი ხელისუფლებას მოუწოდებს, არჩევნებში მონაწილეობა სავალდებულო გახადოს. ამის შესახებ ნათელაშვილმა პარტიის ოფისში გამართულ ბრიფინგზე განაცხადა.
ჩვენი საზოგადოების თავგანწირვით, ოპოზიციურ პარტიათა არნახული ერთიანობით, საერთაშორისო უნიკალური მხარდაჭერით, პრაქტიკულად ვაიძულეთ ხელისუფლება შეეტანა ცვლილებების ძირითად კანონში, გადასულიყო პარტიულ სისტემაზე და ეს ყველაფერი რევოლუციის ტოლფასია, რასაც კიდევ ერთხელ ვულოცავ სრულიად საქართველოს. მაგრამ, რაც არ უნდა ჯანმრთელი იყოს გული, თუ კიდურზე დაიწყო განგრენა, ის დროზე უნდა იქნას მოკვეთილი, სანამ მთელ ორგანიზმს დაანგრევს.
თუ ჩვენს ქვეყანაში არჩევნებში მონაწილეობა არ გამოცხადდა სავალდებულოდ, ვერანაირი რევოლუციური ცვლილება ვერ გვიშველის. ადამიანები, რომლებმაც წლების განმავლობაში გულგატეხილობის, უვარგისი ხელისუფლებების წყალობით, ხელი ჩაიქნიეს ქვეყნის მართვაში მონაწილეობისგან, კვლავ გააგრძელებენ სახლში ჯდომას ან ძირითადად მოვა ის კატეგორია, რომელსაც ოლიგარქები იყიდიან და შედარებით მცირე პროცენტი, რომელიც სულს არ გაყიდის, გულს არ გაყიდის ვერ შექმნის იმ ამინდს, რამაც ჩვენი ქვეყანა უნდა ატყორცნოს კოსმოსურ ორბიტაზე. ამიტომ მოვუწოდებთ ხელისუფლებას, მოეგეთ გონს, გახადეთ არჩევნებში მონაწილეობა სავალდებულო და ყველა უბანზე დადგით ორი ვიდეო კამერა, შიდა და გარე, რათა ერთხელ და სამუდამო დამთავრდეს ფეხის და სულის ქურდობა და სახელმწიფოს მიტაცება ჩვენს ქვეყანაში", - განაცხადა შალვა ნათელაშვილმა.