საქართველოში გერმანიის საელჩო ეხმიანება გერმანიის ფედერალური გენერალური პროკურატურის ზელიმხან ხანგოშვილის მკვლელობასთან დაკავშირებულ პრესრელიზს, სადაც საქართველოს მთავრობა "პრორუსულად" არის მოხსენიებული.
საელჩოს განცხადებით, ინფორმაციაში გაუგებარი ფორმულირებაა გამოყენებული და პროკურატურის მიზანს არ წარმოადგენდა საქართველოს მთავრობის დახასიათება.
"გერმანიის ფედერალურმა გენერალურმა პროკურატურამ დღეს გამოაქვეყნა ინფორმაცია პრესისთვის, რომელიც ეხება საქართველოს მოქალაქის თორნიკე კ.-ს მკვლელობას. ამ ინფორმაციაში გამოყენებულია გაუგებარი ფორმულირება, რომელშიც საუბარია „პრორუსულ“ მთავრობაზე საქართველოში. საქართველოს მთავრობის რაიმე სახით დახასიათება არ წარმოადგენდა გერმანული სამართლებრივი უწყებების მიზანს.
საქართველო არის ევროკავშირისა და ნატო-ს სანდო და მნიშვნელოვანი პარტნიორი", - ნათქვამია საელჩოს მიერ გავრცელებულ განცხადებაში.
ცოტა ხნით ადრე, ფედერალური პროკურატურის განცხადებას გამოეხმაურა ასევე გერმანიის ელჩი საქართველოში, ჰუბერტ ქნირში.
"გერმანიის ფედერალური პროკურატურის განცხადება, რომელიც, ცხადია, უკეთესადაც შეიძლებოდა ყოფილიყო ფორმულირებული, ეხება აწ განსვენებული ხანგოშვილის საკითხს, კერძოდ, რა მიზნით იყო იგი გერმანიაში, აგრეთვე, მის განცხადებას, რომ მისი საზღვარგარეთ ყოფნის მიზეზს წარმოადგენდა საქართველოს პრორუსულ მთავრობასთან დაპირისპირება - ეს გახლავთ მისი სიტყვება და არა გერმანიის პროკურატურის მოსაზრება",- ამის შესახებ ჟურნალისტებს გერმანიის ელჩმა, ჰუბერტ ქნირშმა განუცხადა.
"სამწუხაროა, რომ ამ საკითხის წარმოჩენა იმ კუთხით მოხდა, თითქოსდა გერმანიის პროკურატურას სურდა საქართველოს პოლიტიკური ორიენტაციის რაიმე სახით კორექტირება. სინამდვილეში, ეს მათი განზრახვა არ ყოფილა", - განაცხადა ელჩმა.
18 ივნისს გერმანიის ფედერალურმა პროკურატურამ ზელიმხან ხანგოშვილის მკვლელობაში ეჭვმიტანილს ბრალი წარუდგინა.