სახელმწიფო ინსპექტორმა, ლონდა თოლორაიამ სამსახურის მიერ 2019 წელს განხორციელებული საქმიანობის ანგარიში პარლამენტის ადამიანის უფლებათა დაცვისა და სამოქალაქო ინტეგრაციის კომიტეტზე წარადგინა.
ლონდა თოლორაიამ აღნიშნა, რომ სხვა სახელმწიფო უწყებებთან, კერძო ორგანიზაციებთან, სამოქალაქო სექტორთან, სახალხო დამცველის აპარატთან, საერთაშორისო ორგანიზაციებთან და საზოგადოებასთან კოორდინაცია სამსახურის წარმატებისთვის უმნიშვნელოვანესია.
,,თანამშრომლობისა და კოორდინაციის გარეშე ვერცერთი უწყება ვერ იქნება წარმატებული. მთელი ამ პერიოდის განმავლობაში ჩვენ ვთანამშრომლობდით საქართველოს პარლამენტთან, კანონმდებლობის დახვეწის მიზნით. ჩვენ აქტიური კოორდინაცია გვქონდა სამართალდამცავ ორგანოებთან, გამოძიების მიმდინარეობისას ეფექტიანი თანამშრომლობის უზრუნველსაყოფად. მე მინდა მადლობა გადავუხადო ყველა მათგანს. ჩვენ ვაგრძელებთ მუშაობას ამ კოორდინაციის კიდევ უფრო გასაუმჯობესებლად.
ცხადია, ჩვენთვის საინტერესო და მნიშვნელოვანია სახალხო დამცველის აპარატისა და სამოქალაქო სექტორის მოსაზრებები. ამ პერიოდის განმავლობაში გავმართეთ მათთან შეხვედრები, რათა მოგვესმინა მათი ხედვები და რეკომენდაციები სამსახურის საქმიანობასთან დაკავშირებით.
ჩვენ ასევე აქტიური კოორდინაცია გვაქვს საერთაშორისო ორგანიზაციებთან, რომლებიც არიან სახელმწიფო ინსპექტორის სამსახურის აქტიური მხარდამჭერები", განმარტა ლონდა თოლორაიამ.
