დღეს, 16 ივნისს, საპარლამენტო ფრაქციებში ანტიკრიზისული ბიუჯეტის განხილვა გაგრძელდება.
შეხვედრებია დაგეგმილი ფრაქცია "პატრიოტთა ალიანსი-სოციალ დემოკრატებში" და ფრაქცია "დამოუკიდებელ დეპუტატებში", ასევე საპარლამენტო უმრავლესობის ფორმატში.
საფინანსო-საბიუჯეტო კომიტეტის შემაჯამებელი სხდომა კი 17 ივნისს არის ჩანიშნული, რის შემდეგაც კომიტეტი შენიშვნებითა და რეკომენდაციებით დაუბრუნებს ანტიკრიზისული ბიუჯეტის პროექტს მთავრობას. კორექტირებული ბიუჯეტი კი საგაზაფხულო სესიის დასრულებისას დამტკიცდება.
შეცვლილ ბიუჯეტში შემოსავლები მილიარდ 800 მილიონით მცირდება, ასევე 600 მლნ-ით მცირდება ხარჯვითი ნაწილი. პანდემიის შედეგებთან გასამკლავებლად, მთავრობა ზრდის საგარეო და საშინაო ვალს. სახელმწიფო წელს 14-ის ნაცვლად 16 მილიარდი ლარის დახარჯვას გეგმავს.
ოპოზიციურ პარტიებს ფინანსურ დოკუმენტთან დაკავშირებით კრიტიკული შენიშვნები აქვთ. ფრაქცია „ევროპული საქართველოს“ წევრის, ზურაბ ჭიაბერაშვილის მოსაზრებით, შეცვლილი ბიუჯეტი არ პასუხობს მოქალაქეების პრობლემებს. მისივე განცხადებით, შექმნილი კრიზისიდან გამოსასვლელად, საჭიროა მეტი დახმარების გაცემა მოსახლეობაზე და ასევე გადასახადების შემცირება.
ოპოზიციის კრიტიკას უსაფუძვლოს უწოდებენ მმართველ გუნდში. პარლამენტის ვიცე-სპიკერი გია ვოლსკი აცხადებს, რომ მთვარობის მიერ წარმოდგენილი ანტიკრიზისული ბიუჯეტი პროფესიონალურად და რაციონალურად არის ჩამოყალიბებული.