ვიცე პრემიერ-მინისტრი გიორგი ბარამიძე სამუშაო ვიზიტით დიდ ბრიტანეთში, ედინბურგში გაემგზავრა, სადაც 13-17 ნოემბერს NATO-ს საპარლამენტო ასამბლეის 55-ე სესიის მუშაობაში მიიღებს მონაწილეობას. სესიას დაესწრებიან NATO-ს წევრი 28 ქვეყნისა და პარტნიორი ქვეყნების პარლამენტარები, ასევე მთავრობების წარმომადგენლები და გავლენიანი პოლიტიკოსები. მათ შორის, NATO-ს გენერალური მდივანი ანდერს ფოგ რასმუსენი და დიდი ბრიტანეთის საგარეო საქმეთა მინისტრი დევიდ მილიბენდი.
NATO-ს საპარლამენტო ასამბლეის სესიაზე განიხილავენ ალიანსის წინაშე არსებულ საფრთხეებსა და გამოწვევებს, ასევე NATO-ს ახალი სტრატეგიული კონცეფციის შემუშავების საკითხებს. საპარლამენტო ასამბლეა დიდ როლს თამაშობს NATO-ს გაფართოების პროცესში პოლიტიკის ჩამოყალიბებაში და ამიტომაც, საქართველოსათვის NATO-ს ასამბლეასთან თანამშრომლობა, მსგავსად ევროპის საბჭოს საპარლამენტო ასამბლეისა, ძალიან მნიშვნელოვანია.
ვიცე პრემიერ-მინისტრი სიტყვით მიმართავს საპარლამენტო ასამბლეის "უსაფრთხოების სამოქალაქო განზომილების" კომიტეტს, სადაც ერთი საათის განმავლობაში საქართველოს საკითხის სპეციალური განხილვა გაიმართება. გიორგი ბარამიძე ისაუბრებს ჩვენი ქვეყნის უსაფრთხოების საკითხებზე, რუსეთის აგრესიის, ოკუპირებულ ტერიტორიაზე მიმდინარე ეთნიკური წმენდისა და ადამიანის უფლებების დარღვევის ფაქტებზე, აგრეთვე საქართველოს NATO-ში ინტეგრაციის პროცესისა და ამ მიზნით ქვეყანაში მიმდინარე რეფორმების შესახებ.
გიორგი ბარამიძე მიმართვაში NATO-ს პარლამენტის წევრებს მოუწოდებს, ხმა აღიმაღლონ ოკუპანტების მიერ ჩვენი მოქალაქეების, მათ შორის ბავშვების, გატაცების ფაქტებზე და გადადგან აქტიური ნაბიჯები, რათა მათმა მთავრობებმა განახორციელონ ქმედითი ღონისძიებები დატყვევებულთა გასათავისუფლებლად და მთლიანობაში რუსეთის აგრესიის აღსაკვეთად, ასევე მხარი დაუჭირონ საქართველოს NATO-ში გაწევრიანების პროცესის დაჩქარებას.
NATO-ს საპარლამენტო ასამბლეაზე დაგეგმილია საქართველოს მხარდამჭერი სპეციალური რეზოლუციის მიღება.