ყოფილი პარლამენტარი შოთა შალელაშვილი საარჩევნო სისტემასთან დაკავშირებით ხელისუფლებას და ოპოზიციას შორის მოლაპარაკებების მორიგი რაუნდის გამართვის საჭიროებას ვერ ხედავს.
როგორც შალელაშვილი აცხადებს, პროცესის ჩიხიდან გამოსაყვანად ხელისუფლებას შეუძლია გადაწყვეტილების ცალმხრივად მიღება.
"სიმართლე გითხრათ, მე ვერ ვხედავ პოლიტიკურ ძალებს შორის მორიგი რაუნდის გამართვის საჭიროებას, მითუმეტეს მოცემულ რეჟიმში, როცა ოპოზიციის მოთხოვნა უცვლელია და მათ ამ პოზიციებს უკვე ზურგს უმაგრებენ ქვეყნის პარტნიორებიც. რაუნდის ფორმატში დაბრუნებაზე აპელირება არ იძლევა იმედისმომცემ პერსპექტივებს, თუკი ორივე მხარე რჩება პირვანდელ პოზიციაზე მისი გამართვა შორდება ძირითად ფუნქციას.
აქედან გამომდინარე, ქვეყნის ინტერესების დაცვის მიზნით, მე მოვუწოდებ ხელისუფლებას, ნუ დაკარგავს დროს რაუნდის გამართვის ნაწილში და თავად მიიღოს გადაწყვეტილება ცალმხრივად, მას ეს შეუძლია თავის ძალებით, ოპოზიციასთან შეთანხმების გარეშე, პროცესის ჩიხიდან გამოსაყვანად. ობიექტურობისთვის უნდა ითქვას ისიც, რომ შემოთავაზებული პროპორცია 100/50 -ზე მეტ-ნაკლებად წარმოადგენს კომპრომისულ ვარიანტს.
ნებისმიერ შემთხვევაში, თუნდაც 100/50-ზე პროპორციით მმართველი ძალის მიერ ინიცირებული ცვლილება ჩაითვლება ხელისუფლების კომპრომისულ ვერსიად და ოპოზიციასა და ხელისუფლებას შორის ნდობის აღდგენისთვის წინგადადგმულ ნაბიჯად, რომელსაც ჩემი ღრმა რწმენით, აუცილებლად მოყვება კრიტიკულად განწყობილი საერთაშორისო საზოგადოების შერბილებული შეფასებები.
ამით ხელისუფლება გაამჟღავნებს კეთილ ნებას ვითარების შერბილებისათვის, რითაც შეამცირებს დაძაბულობას საზოგადოებაში. ამ შემთხვევაში ხელისუფლება ვერ იქნება მოლაპარაკებების მამუხრუჭებელი ძალა, რაც ნაწილობრივ შეამსუბუქებს ჩვენი საერთაშორისო მეგობრების მხრიდან კრიტიკას და მას წარმოაჩენს ძალად რომელიც ისწრაფვის მწვავე პოლიტიკურ ვითარების განეიტრალებისკენ, საბოლოო ჯამში ეს მოგვცემს საშუალებას, არჩევნები ჩავატაროთ მშვიდ გარემოში", - აცხადებს შალელაშვილი.
