რესპოდენტის შესახებ
_ ბატონო ირაკლი, 8 ოპოზიციურმა პარტიამ "საარჩევნო კოდექსში" შესატანი ცვლილებების პაკეტი წარმოადგინა. რამდენად კმაყოფილი ხართ მუშაობის პროცესით?
_ წარმოავდგინეთ 5 საკითხი, ქართული და საერთაშორისო ორგანიზაციების სამსჯავროზე. გუშინ გამოითქვა რამდენიმე მოსაზრება, რომლებსაც, ალბათ, გავითვალისწინებთ და ამისათვის სამუშაო ჯგუფი შეიქმნება. კმაყოფილი ვარ, რომ ძირითადმა ოპოზიციურმა პარტიებმა მოახერხეს ერთიანი პოზიციის შემუშავება. 15 წლის განმავლობაში ვერ ხერხდებოდა ერთიანი ხედვა ყოფილიყო კოდექსთან დაკავშირებით და შეთანხმებულები ყოფილიყვნენ პარტიები, რომ ისინი ერთიანი პოზიციით, გადაწყვეტილების მიღების მექანიზმით გავიდოდნენ ამ საკითხზე მოლაპარაკებების დროს. ამ მხრივ, პატარა ნაბიჯი წინ არის გადადგმული, თუმცა მთავარია შედეგი. საზოგადოებას აინტერესებს, შედეგი თუ დადგება, თორემ ეს არის ნაწილი დიდი პროცესისა.
_ თქვენ თქვით, რომ ძირითადი ნაწილი ოპოზიციური, კვალიფიციური პარტიებისა შეთანხმდნენ, თუმცა "საარჩევო კოდექსში" ინიცირებული ცვლილებების წარდგენაზე არ ყოფილა 3 კვალიფიციური ოპოზიციური სუბიექტი - "ლეიბორისტული პარტია", "მრეწველები" და პარტია "თავისუფლება"...
_ სამივეს დაგზავნილი ჰქონდა მოწვევა. "მრეწველებმა" თავიდანვე უარი განაცხადეს ერთიან ფორმატში მუშაობაზე. გამსახურდიაზე ვერ გეტყვით. "ლეიბორისტებს" რაც შეეხება, რამდენადაც ვიცი, ისინი თავიანთ ხედვების წარმოდგენას აპირებენ და ვფიქრობ, თანამშრომლობა მათთანაც მოხერხდება.
_ მაგრამ "მრეწველების" ერთ-ერთმა ლიდერმა ზურაბ ტყემალაძემ "ჯი-ეიჩ-ენთან" საუბარში განაცხადა, რომ მათ ურჩევნიათ საკუთარი აზრი ჰქონდეთ, ვიდრე "სხვების მიერ მიღწეულ შეთანხმებას იძულებით ეთანხმებოდნენ"...
_ ბიზნესიდან მოსულ ხალხს მე არ უნდა ვასწავლიდე ამას: საერთოდ, შეთანხმებაზე როცაა ლაპარაკი, ეს ნიშნავს, რომ როდესაც რაღაცაზე თანხმდები, ის პირობები უნდა დაიცვა. მაპატიოს, დიდი პატივისცემით, ბატონმა ზურაბმა, მაგრამ აქ წარმოდგენილი პარტიები საკმაოდ წონიანები და რეიტინგულები არიან და რაღაც ამბიციების გადადება უკან და საერთო აზრამდე მისვლა გამომდინარეობს არა ჩვენი ახირებიდან, არამედ შედეგზე ორიენტირებიდან. ნებისმიერ სხვა შემთხვევაში რა ხდება, ამის გამოცდილება არსებობს ძალიან დიდი - 2000 წელს, 2001 წელს, 2002 წელს 2005 წელს 2008 წელს, როდესაც პარტიები ცალ-ცალკე გადიოდნენ და რაღაც საკითხებზე ევაჭრებოდნენ ხელისუფლებას, მათ შორის საარჩევნო კოდექსის საკითხებზე. შედეგი ყოველთვის ხელისუფლების სასარგებლოდ იყო. იმ გამოცდილებიდან გამომდინარე, მიგვაჩნია, რომ ასეთი შეთანხმების მიღება, ერთიანი პოზიციის წარდგენა არის აუცილებელი. "მრეწველების" გადასაწყვეტია რას იზამენ.
_ საუბრის დასაწყისში შედეგი ახსენეთ და მთავარი, ალბათ, მაინც ხელისუფლებასთან გასამართი მოლაპარაკებების პროცესია... როგორ ფიქრობთ, წამოვა თუ არა ხელისფლება მოლაპარაკებებზე და შემდეგ უკვე დათმობებზე?
_ ამ კოდექსში რაც არის ჩამოყალიბებული, ძალიან რთულია, თქვა არგუმენტირებული უარი. მაგალითად, ბიომეტრიული პირადობის მოწმობების გაცემა დაიწყო, პასპორტების გაცემა დაიწყო. ბიომეტრია არის საშუალება იმისა, რომ დავთვალოთ ყველა ამომრჩეველი, რეალურად. ამომრჩეველთა სიებში აღარ იყოს გაყალბება და არჩევნების დღეს, ხმის მიცემა ჩატარდეს სისტემით, ერთი ხმა - ერთი ამომრჩეველი. საინტერესოა არგუმენტი, რატომ არ ვაკეთებ ამას, მაშინ, როდესაც საერთაშორისო ორგანიზაციები მზად არიან ამ სისტემას ფინანსურად დაეხმარონ. ანუ ფინანსური პრობლემა არ არის, ტექნიკური პრობლემა არ არსებობს, სისტემა აშკარად უკეთესია, მაშინ არგუმენტი რა გამოდის? არ დაგათვლევინებ ამომრჩეველს და კიდევ ისე გავაყალბებ? ეს სხვა პროცესია. თუ პირდაპირ მეუბნები, რომ ქვეყანაში დიქტატურაა და როგორც მე მინდა ყველაფერი ისე უნდა გაკეთდეს, მაშინ დიალოგზე ლაპარაკი ზედმეტია, მაშინ დილოგი გადადის დაპირისპირებაში. ხელისუფლება ამბობს ულტიმატუმებით ნუ გველაპარაკებითო. ულტიმატუმებით არ ვლაპარაკობთ, ჩვენ ვამბობთ ასეთ რამეს: არჩევანი არის ორ გზას შორის - ერთი, რომ შევქმნათ ნორმალური საარჩევნო გარემო და ქვეყანა წავიდეს იმ გზით, რომ არჩევნებით შეიცვალოს ხელისუფლება და მეორე, თუ მეუბნები, მე მინდა დიქტატურა შევქმნა და როგორც მინდა ისე მოვიქცე - სიებიც უნდა გავაყალბო და არჩევნებიც, მე ვიძახი, რომ ამას ჩვენ არ შევეგუებით. ჩვენ გვაინტერესებს, რომ ხელისუფლებამ თქვას ან კი, ან არა. კის შემთხვევაში მზად ვართ ამ სისტემით წავიდეთ და მოსახლეობას ავუხსნათ, რა მოაქვს ამას. არას შემთხვევაში მზად ვართ წინააღმდეგობის გზით წავიდეთ. ერთისთვისაც ვემზადებით და მეორესთვისაც. თუ ხელისუფლებას წარმოუდგენია, რომ ეს არის გაწელილი პროცესი, ძალიან ცდება. კარგად ვიცით - თუ პროცესი გაიწელა ხელისუფლება იტყვის, რომ პროცესი გაიწელა, ამის იმპლემენტაცია ვერ მოესწრება, ახლა, მოდი ეს არჩევნები ჩავატაროთ და მერე ახალმა პარლამენტმა გადაწყვიტოს ეს საკითხიო. ამიტომ ჩვენ, "ფორუმი", ვემზადებით კისთვისაც და არასთვისაც. დროის გაწელვა ხელისუფლების მხრიდან ჩემი აზრით, იქნება ყველაზე ცუდი სტრატეგია.
_ საერთაშორისო ორგანიზაციები ახსენეთ და როგორ ფიქრობთ პროცესში მათ მონაწილეობას შეუძლია თუ არა ხელისუფლებაზე ზეგავლენა იქონიოს და ის ცვლილებები, რომელსაც თქვენ ითხოვთ, განახორციელებინოს...
_ უნდა ვთქვა, ძალიან მკაფიოდ. ჩვენს ქვეყანაში ცვლილებები მოხდება თუ არ მოხდება, ეს პირველ რიგში არის ქართული საზოგადოების საქმე. საერთაშორისო ორგანიზაცია ვერავის ვერაფერს აიძულებს. ისინი შესაძლოა გამოიყენო დამხმარედ ამ პროცესში. ექსპერტიზისა და სხვა მსგავს საკითხებში მათი ჩართულობის გამოყენება შეიძლება, მაგრამ ხელისუფლება უნდა ვაიძულოთ ჩვენ, ქართულმა საზოგადოებამ, თუ გვინდა, რომ ისე მოვაწყოთ ეს ქვეყანა, როგორც ჩვენ გვსურს. თუ იმის იმედი გვაქვს, რომ ობამა ან ევროკავშირი მიშიკოს აქედან წაიყვანს, ეს არის ოცნება. რეალობა კი არის ასეთი: არსებობს ხელისუფლება. თუ ყველა ოპოზიციური პარტია ვამბობთ, რომ მშვიდობიანად უნდა შეიცვალოს ხელისუფლება, ეს ნიშნავს იმას, რომ ხელისუფლება უნდა შეიცვალოს არჩევნების გზით. არჩევნები რომ ჩატარდეს, ამისთვის ნორმალური საარჩევნო გარემო გვჭირდება. ან თავი უნდა დავანებოთ იმაზე ლაპარაკს, რომ მშვიდობიანად გვსურს ხელისუფლების შეცვლა, ან თუ ვაპირებთ ამას, საზოგადოება უნდა დავიყენოთ გვერდში. საერთაშორისო ორგანიზაციების როლი ჩემთვის არის ძალიან გამოკვეთილი, მაგრამ ძალიან შემოფარგლული. ქვეყანაში როგორი საარჩევნო კანონმდებლობა იქნება _ ეს არის ჩვენი გადასაწყვეტი, სხვები შესაძლოა დაგვეხმარონ, რჩევით, ექსპერტიზით და ასე შემდეგ.
_ თქვენ განმარტეთ, რომ "ეროვნული ფორუმი" მზად არის მოვლენების ორგვარი განვითარებისთვის. რას აპირებთ იმ შემთხვევაში, თუ ხელისუფლებასთან მოლაპარაკებების პროცესი ჩაიშლება...... თქვენი პარტიის ლიდერი კახა შარტავა საუბრობდა, რომ "ფორუმს" შეუძლია ფართომასშტაბიანი აქციის ორგანიზებაც......
_ შეგვიძლია და ამის გაკეთებასაც ვეცდებით, თუ ამის აუცილებლობა დადგება. აქცია თვითმიზანი არ არის. მიზანი არის შედეგის მიღწევა. რაც დასჭირდება ამ მიზნის მიღწევას ყველა მეთოდს გამოვიყენებთ მათ შორის აქციებსაც. ჩემი პრადი მოსაზრებით, ამის გაკეთება მოგვიწევს, რადგან კარგად ვიცნობ ამ ხელისუფლებას.
_ "საარჩევნო კოდექსში" თქვენს მიერ ინიცირებული განხორციელების შემთხვევაში იტყვით თუ არა, რომ საარჩევნო გარემო სრულად გაუმჯობესდა?
_ ამ ხუთი ცვლილებით, რომელიც გამოვიტანეთ, ეს ნიშნავს, რომ საარჩევნო კოდექსი შეიცვლება და ამ კოდექსით შეუძლებელი გახდება არჩევნების დღეს, არჩევნების გაყალბება. რაც შეეხება საარჩევნო გარემოს, ეს არის ბევრად დიდი მცნება ვიდრე კოდექსი. საარჩევნო გარემო მოიცავს მედიის თავისუფლებასაც, ტერორის აღკვეთასაც და უამრავ სხვა საკითხსაც. ცვლილებები კოდექსში არის საარჩევნო გარემოს ნაწილი. ჩვენს მიერ ინიცირებული საარჩევნო კოდექსიც, რომ მიიღონ, თუ ის პრობლემები არ გადაიჭრა, რაც არის მედიაში, თუ ტეროტი არ შემცირდა, ეს ყველაფერი თუ ვერ მოხერხდა, თავისუფალი არჩევნები მაინც ვერ ჩატარდება. არჩევნები პრაქტიკულად ყალბდება არა არჩევნების დღეს არამედ მანმადე.
_ რასაც თქვენ ამბობთ დაახლოებით მსგავს განცხადებას აკეთებს ნინო ბურჯანაძის პარტია, რომლის მიხედვითაც, საარჩევნო კოდექსში ცვლილებებით საარჩევნო გარემო მაინც ვერ შეიცვლება და კოდექსთან დაკავშირებით მიმდინარე მოლაპარაკებების პროცესი ხელისუფლების წისქვილზე დაასახვს წყალს - ხელისუფლება პროცესის გაჭიანურებით წლიწად-ნახევარს გადააგორებს..
_ წელიწადნახევარი ეს მოლაპარაკებები, რომ გაგრძელდეს ბიომეტრიის იმპლიმენტაცია ვერ მოხერხდება, იმიტომ, რომ საკითხი უნდა გაირკვეს დეკემბრამდე იმისათვის, რომ დონორების ბიუჯეტში ჩაჯდეს ეს ყველაფერი. ჩვენ ვფიქრობთ, რომ სადღაც ორ თვეში, ძალიან მნიშვნელოვან საკითხებზე ხელისუფლებამ ან კი უნდა თქვას, ან არა. რაც შეეხება გადააგორებას, მე სულ მაინტერესებს ვინ რას აკეთებს, იმ ხალხზე მაქვს საუბარი, ვინც ამბობს, რომ ვიღაცა ვიღაცას რაღაცას აგორებინებს. თუ საუბარი იმაზე, რომ ამომრჩეველთა სიები გაუმჯობესდეს, ხელისუფლებას არჩევნების დღეს გაყალბების მექანიზმები წაერთვას არის ცუდი და ეს არგვჭირდება, მაშინ გვითხრან ალტერნატივა, გვითხრან ისიც, ხელს რატომ აწერდნენ ორი თებერვლის განცხადებას. იქ ქალბატონი ნინო ბურჯანაძის ხელმოწერაც არის. ამიტომ ეს უნდა გავარკვიოთ. მეორე მხრივ, ეს პროცესი რას უშლის ხელს ვინმეს, ვინც სხვა მეთოდი იცის და სურს ხელისუფლების მოშორება? იმათ უშლით ხელს რამეში? მათ აქვთ მოქმედების თავისუფლება.
_ საინტერესოა ვადების საკითხზე თქვენი შეხედულება. რა ვადებში შეიძლება დასრულდეს საარჩევნო კოდექსთან დაკავშირებით ხელისუფლებასთან მოლაპარაკებების პროცესი?
_ ძირითად საკითხებზე დაახლოებით 2 თვის განმავლობაში ხელისუფლებამ უნდა თქვას ან კი, ან არა. მოდის ცვლილებებზე თუ არ მოდის. თუ შეთანხმება იგივე ბიომეტრიაზე არ მოხერხდა, ეს ცვლილება არჩევნებამდე ვერ განხორციელდება. ამიტომ, ჩვენ ვართ მაქსიმალურად დაინტერესებულები, რომ დროულად მოხდეს ეს ყველაფერი. კიდევ ერთხელ ვიმეორებ არავის ალტერნატიული გეგმა არ მომისმენია და ძალიან მოხარული ვიქნები თუ ვინმეს განსხვავებულ გეგმას მოვისმენ. უნდა გავარკვიოთ, ხელისუფლებას უნდა ვაიძულოთ, რომ პასუხი თქვას ამაზე და შემდეგ შესაბამისად ვიმოქმედოთ. ეს პროცესი მე არ მგონია, რომ ნოემბერს გასცდეს.
_ თქვენი აზრით, როდის დასრულდება საქართველოში უსამართლო საარჩევნო გარემოზე საუბარი და "საარჩევნო კოდექსის" გარდა აპირებთ თუ არა სხვა საკითხებზე მუშაობასაც იგივე მედიის და ტერორის პრობლემების მიმართულებით, რაც თქვენ ახსენეთ...
_ ჩვენ განვაცხადეთ, რომ ძალიან მალე გაიმართება კონფერენცია საარჩევნო გარემოს სხვა კომპონენტებთან დაკავშირებით და სხვათა შორის უკვე გამართული კონფერენციის დროს იყო შეხვედრა რამდენიმე ადამიანთან, რომლებიც ამ საკითხებზე მუშაობენ. იგივე მედიის თავისუფლების კუთხით და ალბათ, უახლოეს მომავალში, მაქსიმუმ 2 კვირაში, ამ საკითხებზე კონფერენცია გაიმართება.
- ამ საკითხებზეც ის პარტიები იმუშავებენ, ვინც საარჩევნო კოდექსში შესატანი ცვლილებების ინიაციატორები იყვნენ?
_ აქ მუშაობდა ინტერპარტიული სამუშაო ჯგუფი. ეს თემები ეხებოდა საარჩევნო კოდექსს და ამ შემთხვევაში პარტიების კვალიფიკაცია ყოფნდა, მაგრამ როდესაც საქმე ეხება ისეთ საკითხებს, განსაკუთრებით მინდა გამოვყო მედიის თავისუფლების საკითხი - აქ პროფესიონალიზმის თვალსაზრისთ სხვა პირების ჩართვაც საჭიროა. ამ საკითხებზე მუშაობის დროს ჩვენ აუცილებლად არასამთავრობო ორგანიზაციების, მედიის წარმომადგენლების როლს წინ წამოვწევთ, განხილული იქნება მათი შემოთავაზებები და წინადადებები.
_ არჩევნებში გამარჯვებისათვის ოპოზიციას სამართლიან საარჩევნო გარემოსთან ერთად მაღალი რეიტინგიც დასჭირდება. რა უნდა გაკეთდეს იმისათვის, რომ ოპოზიციური პარტიების რეიტინგმა მოიმატოს?
_ ოპოზიცია უნდა გააქტიურდეს და მოსახლეობასთან იმუშაოს. ჩვენც და სხვამაც. ეს არის ყველაზე მარტივი რამ. რეიტინგი არის მოსახლეობის მხარდაჭერა. თუ მოსახლეობას არ შეხვდი არ აუხსენი და განუწყვეტლივ პარტიის ოფისში პრესკონფერენციები ატარე და იძახე, რომ "იმედს" არ მიხსნიან და "რუსთავი 2"-ს არ მიხსნიან, არაფერი გამოვა.
_ დღეს, რომ ტარდებოდეს არჩევნები იმ საარჩევნო კოდექსით, რასაც თქვენ ითხოვთ, როგორ ფიქრობთ, რომელიმე ოპოზიციური ძალა შეძლებს ხელისუფლების დამარცხებას?
_ გააჩნია როგორი კონფიგურაცია იქნება. დღეს, რომ სამართლიანი საარჩევნო გარემო მიღწეული იქნას, საზოგადოებში მნიშვნელოვან ცვლილებებს გამოიწვევს განწყობის თვალსაზრისითაც. იმიტომ, რომ იმედი გაჩნდებოდა. ხელისუფლებას შედეგები ბოლო არჩევნებზე გამომდინარეობდა არა იქიდან, რომ ხელისუფლება უფრო მეტად მოსწონს ხალხს ვიდრე რამდენიმე წლის წინ, არამედ გამომდინარეობდა იქიდან, რომ ხალხს იმედი არ ჰქონდა იმისა, რომ არჩევნებით რამე შეიცვლებოდა. ადამიანმა უნდა დაიჯეროს, მის არჩევანს აზრი აქვს. კოდექსში ცვლილებები სწორედ ამისათვის არის საჭირო. დანარჩენი უკვე ოპოზიციურ პარტებსა და მათ აქტიურობაზე იქნება დამოკიდებული - ვინ რას მიაწვდის საზოგადოებას. რა თქმა უნდა, ეს ცვლილებები გამოიწვევს იმას, რომ ხელისუფლებას წავართმევთ იმ ყალბ ხმებს, რომელსაც უკანონო გზებით აგროვებდა.
_ ყალბ ხმებთან ერთად თქვენი პარტიის ლიდერები ხშირად საუბრობდნენ, რომ კიდევ არსებობს ასე ვთქვათ, 20 ლარად ნაყიდი ხმები... ამის პრევენციას თუ ითვალისწინებს საარჩევნო კოდექსში შესატანი ცვლილებები?
_ ადამიანის პატიოსნებას ვერანაირი საკანონმდებლო ჩარჩოებით ვერ შემოფრგლავ. ეს არის მოქალაქის კულტურის ამბავი. სამოქალაქო კულტურა, პოლიტიკური კულტურა, ღირსება, ამ ყველაფერს ვერცერთი კოდექსით ვერ დაარეგულირებ. ეს არ რეგულირდება. მოქალაქემ თავად უნდა გადაწყვიტოს, ის თუ 10 ლარად ყიდის თავისი შვილის მომავალს, ამას ვერ აუკრძალავ, რაც არ უნდა სანქციები დაუწესო მაინც გაყიდის.
_ წარმომადგენლობით სახალხო კრებაზეც უნდა გკითხოთ, რატომ არ მივიდა "ეროვნული ფორუმი" ფილარმონიაში გამართულ კრებაზე?
ჩვენსა და მათ შორის მაისის მოლაპარაკების შემდეგ უნდა შემდგარიყო შეხვედრა, რომელიც არ შედგა. დღესაც არ ვიცით მათი გეგმები. სექტემბრის დასაწყისში შევხვდით ბატონ გოგი ქავთარაძეს მასაც მივეცით დოკუმენტი, სადაც ასახული იყო ჩვენი წინადადებები, უნდა დაგვკავშირებოდნენ და შეხვედრა შემდგარიყო, თუმცა ისინი არ დგავკავშირებიან. ჩვენ ჩავთვალეთ, რომ მათ აქვთ განსხვავებული ხედვა. არ აინტერესებთ ჩვენი შეთავაზება და ახლა ვუყურებთ როგორ განვითარდება მოვლენები. კონტაქტები გვაქვს, მაგრამ ის კამპანია, რომელიც მათი მხრიდან დაიწყო ჩვენს წინააღმდეგ, სხვათა შორის ძალიან ბინძური მეთოდით, უნდა დარეგულირდეს.
_ იქნებ დააკონკრეტოთ რას გულისხმობთ?
_ როდესაც პრესაში ლაშა ამირეჯიბი წერს, რომ მე თურმე ჯავახეთში ჩავედი და 50 ლარი დავურიგე მოსახლეობას იმისათვის, რომ ისინი მიტინგისათვის თბილისში ჩამომეყვანა, იმ მიტინგზე, რომელიც არც დაგვინიშნავს და მე ჯავახეთში 5 წელია ნამყოფი არ ვარ. როდესაც სახალხო კრების საინიციატივო ჯგუფის წარმომადგენელი წერს ამას, რომ თურმე ვანო მერაბიშვილის თანამშრომლები უძღვებოდნენ ამ ყველაფერ წინ, ან ვიღაცამ უნდა დაადასტურეს, რომ მე ჯავახეთში მნახეს, ან ეს არის პრინციპი - მე შენ ახლა ლაფს შეგასხავ და წადი ირაკლი მელაშვილო და ამტკიცე ჯავახეთში იყავი თუ არა. როდესაც ასეთი ბინძური მეთოდებით ხდება ადამიანებთან ბრძოლა, ეს უკვე სხვა სახეს იღებს და ამას პოლიტიკასთან არავითარი კავშირი არ აქვს.
_ საზოგადოების გარკვეულ წრეებში მუსირებს აზრი, რომ ფორუმი სახალხო კრებაზე არ მივიდა ნინო ბურჯანაძის ფაქტორს გამო...
_ "ფორუმი" იმიტომ არ მივიდა კრებაზე, რომ არსებობდა ჩვენ მიერ შეთავაზებული გეგმა, რომელიც არ განხორციელდა, მათ შორის იქ ბურჯანაძეც ფიგურირებდა. სახალხო კრება არის ისეთი რამ, სადაც ვერავის აუკრძალავ ყოფნას და ვერ დააძალებ მისვლას. მათ რეალური ბრალდება ვერ მოძებნეს. არ მოეწონათ ჩვენ მიერ შეთავაზებული გეგმა, სადაც ბურჯანაძესაც შეეძლო მონაწილეობა. ამის მაგივრად კი დაგვაბრალეს, რომ ფორუმი კრებაზე იმიტომ არ მივიდა, ნინო ბურჯანაძის შეეშინდაო. დანამდვილებით შემიძლია გითხრათ, რომ არც მისი ავტორიტეტის გვეშინია და არც მისი რეიტინგის...
_ სამაგიეროდ სახალხო კრების წევრი გოგი ქავთარაძე მოვიდა 8 პარტიის მიერ ინიცირებულ კონფერენციაზე. ისაუბრეთ თუ არა მასთან წარმომადგენლობით სახალხო კრებაზე?
_ იქ ამაზე სასაუბრო ადგილი არ იყო. ამ ადამიანებთან ჩვენ კონტაქტები გვაქვს და ამ შეხვედრები და საუბრები გაგრძელდება. რამდენადაც შეთანხმებადი იქნება ჩვენი პოზიციები, ისეთი იქნება თანამშრომლობის ხარისხი. არავისთან პერსონალური და პირადული დამოკიდებულება ჩვენ არ გაგვაჩნია, ფორუმი დღეს იმ მდგომარეობაში არ იმყოფება, რომ ვინმეს რეიტინგის ან ავტორიტეტის ეშინოდეს. მე პირადად ერთი კითხვა მაქვს: ჟურნალისტებმა, ან საზოგადოებამ თუ იცის რას აპირებს წარმოამდგენლობითი სახალხო კრება, მე პირადად არ ვიცი და ამაზეა ლაპარაკი.
"ჯი-ეიჩ-ენი", ესაუბრა დავით ქოქოშვილი