2010 წლის მეორე კვარტალში საქართველოს მიმდინარე ანგარიშის დეფიციტი წინა კვარტალთან შედარებით 77%-ით გაიზარდა და 319 მლნ აშშ დოლარი შეადგინა, ამის შესახებ ინფორმაციას "ბი ჯი კაპიტალი" ავრცელებს.
ანგარიშის დეფიციტის ზრდის მიზეზაც, "ბი ჯი კაპიტალი" საქონლის სავაჭრო დეფიციტის ზრდითა და მიმდინარე ტრანსფერების ბალანსის შემცირებით ხსნის.
"ბი ჯი კაპიტალის" ინფორმაციით, კაპიტალისა და ფინანსური ანგარიშის ბალანსი წინა კვარტალთან შედარებით 13%-ით შემცირდა და 86 მლნ აშშ დოლარი შეადგინა. ეს ძირითადად გამოწვეული იყო საბანკო სექტორიდან კაპიტალის გადინებით.
მთლიანობაში ქვეყნის საგარეო საფინანსო დეფიციტმა 2010 წლის მეორე კვარტალში 233 მლნ აშშ დოლარი შეადგინა, ხოლო მიმდინარე წლის პირველ ნახევარში ჯამში 314 მლნ აშშ დოლარი.
"2010 წლის მეორე ნახევარში, ჩვენი პროგნოზით, მიმდინარე ანგარიშის დეფიციტი გაიზრდება ძირითადად იმპორტის სეზონური ზრდის შედეგად, თუმცა ჩვენ ვერ ვხედავთ რისკებს მიმდინარე ანგარიშის დეფიციტის 2010 წლის პროგნოზთან დაკავშირებით, რომელიც 1.2 მლდ აშშ დოლარს შეადგენს (2010 წლის მშპ-ს პროგნოზის 10.8%). რაც შეეხება ფინანსურ ანგარიშს, ჩვენ ვვარაუდობთ, რომ კაპიტალის გადინება საბანკო სექტორიდან გაგრძელდება. ჩვენი პროგნოზით, 2010 წლის მეორე ნახევარში პირდაპირი უცხოური ინვესტიციები მიმდინარე წლის პირველ ნახევართან შედარებით 25%-ით გაიზრდება,"- აცხადებს სააქციო კაპიტალის ბაზრის ანალიტიკოსი გიორგი ირემაშვილი.