საქართველოში ვიზიტით მყოფი ევროკავშირის პოლიტიკისა და უსაფრთხოების კომიტეტის ელჩებმა ლტოლვილთა და განსახლების მინისტრთან კობა სუბელიანთან ერთად წეროვანის დასახლება მოინახულეს.
დიპლომატებმა დაათვალიერეს წეროვანის საჯარო სკოლა, რომელმაც წელს დაიწყო ფუნქციონირება, აგრეთვე ადმინისტრაციული შენობა. მინისტრი გაესაუბრა მათ მთავრობის მიერ გაწეული სამუშაოების, კერძოდ, წეროვენის დასახლებაში გაშენებული ინფრასტრუქტურის შესახებ და უპასუხა კითხვებზე.
"მათ, რა თქმა უნდა, ჰქონდათ ინფორმაცია მონიტორებისგან, მაგრამ დღეს ყველაფერი საკუთარი თვალით ნახეს და უნდა ითქვას, ნანახმა მათზე დიდი შთაბეჭდილება მოახდინა. ეს ყველაფერი ჩვენი მეგობრების დახმარებით გაკეთდა. ყველა თანხმდება იმაზე, რომ გასაკეთებელი კვლავაც ბევრია, მაგრამ ჩვენ ამას აუცილებლად განვაგრძობთ. მთავარია, რომ დევნილები საკუთარ ჭერქვეშ ცხოვრობენ", -აღნიშნა სუბელიანმა.
წეროვანის დასახლების დათვალიერების შემდეგ ელჩები ოკუპირებულ ტერიტორიებზე სიტუაციის გასაცნობად გაემგზავრნენ.
ევროკავშირის პოლიტიკისა და უსაფრთხოების კომიტეტის 27 ელჩი საქართველოში ორდღიანი სამუშაო ვიზიტით დღეს, 12 ნოემბერს ჩამოვიდა.