სიღნაღის რაიონის სოფელ ვაქირში მცხოვრები ხუთი შვილის დედა ესმა რუსიშვილი სოციალური მომსახურების სააგენტოს სიღნაღის განყოფილებას მისი უფლებების დარღვევაში ადანაშაულებს. ამის შესახებ "ჯი-ეიჩ-ენს" კახეთის საინფორმაციო ცენტრიდან აცნობეს. მათი ინფორმაციით, რუსიშვილებს საცხოვრებელი სახლი 2004 წელს დაეწვათ. მას შემდეგ, ოჯახი, თავს დროებით სხვის სახლს აფარებს. რუსიშვილების მთელი ქონება 1 ტელევიზორი და 3 რკინის საწოლია, სადაც 7 ადამიანს სძინავს. გაუსაძლისი მდგომარეობის მიუხედავად, სოციალური მომსახურების სააგენტომ უკიდურესად გაჭირვებულ ოჯახს საარსებო შემწეობა მაინც შეუწყვიტა.
"ხუთი შვილი მყავს, 16, 14, 11, 7 და 4 წლის. მე და ჩემი მეუღლე ვერ ვმუშაობთ. სანამ საარსებო შემწეობა დაგვენიშნებოდა, დღიურად სხვის ნაკვეთებში ვმუშაობდით და პურის ფულს ვშოულობდით. ახლა ყველას უჭირს და ნაკვეთში სამუშაოდაც აღარავინ გვეძახის. დახმარებიდან დახმარებამდე ნახევრად მშივრები ვიყავით, მაგრამ შიმშილით არ ვიხოცებოდით. 174 ლარს ისე ვანაწილებდით, რომ პური მაინც გვქონოდა. რამდენიმე დღის წინ სოციალური აგენტი მოვიდა და საარსებო შემწეობის შეწყვეტაზე ხელი მომაწერინა. მითხრა, დახმარებას ვეღარ აიღებო", - აღნიშნავს ესმა რუსიშვილი,
სოციალური მომსახურების სააგენტოს სიღნაღის განყოფილების ინფორმაციით, ესმა რუსიშვილის ოჯახს, რომლის უფლებამოსილი წარმომადგენელიც ნუგზარ ჯანაშვილია, საარსებო შემწეობა ახლად აღმოჩენილი გარემოების გამო შეუწყდა.
კახეთის საინფორმაციო ცენტრი ახლად აღმოჩენილი გარემოების დასაზუსტებლად სოციალური მომსახურების სააგენტოს პრესსამსახურის უფროსს ეკატერინე ალავიძეს დაუკავშირდა, თუმცა მისგან ინფორმაცია ვერ მიიღო.
