დაზარალებული კახეთის რეგიონისთვის 700 ათასი ლარი გამოიყო. ამის შესახებ "ჯი-ეიჩ-ენს" რადიო "ჰერეთიდან" აცნობეს. მათი ინფორმაციით, კახეთში სტიქიის პრევენციული სამუშაოსთვის სახელმწიფო ბიუჯეტიდან 700 ათასი ლარი გამოიყო. აქედან 400 ათასი სასმელი წყლის სათავე ნაგებობების აღდგენას მოხმარდება, 300 ათასი კი - გზებისა და ხიდების შეკეთებას.
სტიქიით დაზარალებული რაიონებისთვის თანხის გამოყოფა კიდევ იგეგმება. სტიქიამ კახეთის რეგიონს რამდენიმე მილიონი ლარის ზარალი მიაყენა, დაზუსტებული მონაცემები ჯერ არ არსებობს.
ცნობილია, რომ ყველაზე მეტად ლაგოდეხისა და ყვარლის რაიონები დაზარალდა.
ბევრ სოფელში საერთოდ განადგურდა, ხოლო ზოგან დაზიანდა ინფრასტრუქტურა, ძირითადად ნაპირსამაგრი გაბიონები და სასმელი წყლის სათავე ნაგებობები. დატბორილია ათას ჰექტარზე მეტი სასოფლო- სამეურნეო ნაკვეთები.
ახმეტის რაიონში დაზარალებულია 75 ოჯახი. აღსადგენია ახმეტა-თიანეთის გზის 200-მეტრიანი მონაკვეთი და ახმეტის წყალსადენის სათავე ნაგებობა.