რეინტეგრაციის საკითხებში სახელმწიფო მინისტრის თემურ იაკობაშვილის შეფასებით, "რუსეთში დაბნეულობა შეინიშნება". ასეთი შეფასების გაკეთების საფუძველს იაკობაშვილს ჟენევის მოლაპარაკებათა მერვე რაუნდი აძლევს, რომელიც უშედეგოდ დასრულდა.
"რუსეთს ერთი დოკუმენტი ხან მოსწონს, ხან - არა. ხშირად ცვლის პოზიციას, ეს კი იმითაა გამოწვეული, რომ ოკუპაციის გამართლება და საქართველოს ინტერესების ხარჯზე ვაჭრობის დაწყება ვერ მოახერხა", - განუცხადა იაკობაშვილმა ჟურნალისტებს.
სახელმწიფო მინისტრის გაღიზიანებას რუსეთის პრეზიდენტის მიერ დღეს გაკეთებული განცხადებაც იწვევს, რომელშიც მედვედევმა აღნიშნა, რომ აგვისტოს მოვლენების თავიდან აცილება შესაძლებელი იქნებოდა, პროცესში მეტი საერთაშორისო ჩართულობა რომ ყოფილიყო.
"ასეთ განცხადებებს ჩვენ ვაკეთებდით და რჩება შთაბეჭდილება, რომ ერთი ერთზე გადაიღეს", - დასძინა იაკობაშვილმა.
