მეორე დღეა გრძელდება ბელარუსის დედაქალაქში რუსეთთან ინტეგრაციის საწინააღმდეგო აქცია.
მინსკის ცენტრში, ოქტომბრის მოედანზე თავდაპირველად რამდენიმე ათეული დემონსტრანტი შეიკრიბა, თუმცა, მოგვიანებით საპროტესტო აქციის მონაწილეთა რაოდენობა 700-მდე გაიზარდა.
დემონსტრანტებს ხელთ ეპყრათ ბელარუსის უწინდელი დროშა თეთრი და წითელი ფერებით და ტრანსპარანტები წარწერებით - "ნუ გავიმეორებთ ყირიმის სცენარს", "არა რუსულ ოკუპაციას", "გაუმარჯოს ბელარუსს".
ხელისუფლების მიერ არასანქცირებულ მიტინგზე დემონსტრანტებსა და პოლიციას შორის მცირე შეხლაშემოხლა მოხდა. თუმცა აქცია ძირითადად მშვიდობიან გარემოში მიმდინარეობდა.
მედიაში გავრცელდა ინფორმაცია, რომ პოლიციამ დააკავა პირი, რომელიც დემონსტრანთა მხარდასაჭერად მიემართებოდა.
აქციის მონაწილეება გაავრცელეს განცხადება, სადაც "კატეგორიული პროტესტი" გამოხატეს რუსეთთან ინტეგრაციის წინააღმდეგ.
აქტივისტები მოუწოდებენ საერთაშორისო საზოგადოებას, გამოიჩინონ ყურადღება და ბელარუს-რუსეთის ინტეგრაციის დოკუმენტის წინააღმდეგ სანქციები შემოიღონ.
დემონსტრანტებმა ოქტომბრის მოედნიდან მსვლელობა რუსეთის საელჩოსკენ განაგრძეს და ერთობლივი განცხადება საელჩოს წარმომადგენლებს გადასცეს.
საპროტესტო აქციები მინსკის ქუჩებში გუშინ დაიწყო, სოჭში ბელარუსისა და რუსეთის პრეზიდენტებს შორის მიმდინარე შეხვედრის ფონზე.
გუშინ, 7 დეკემბერს, სოჭში რუსეთისა და ბელარუსის პრეზიდენტების შეხვედრა გაიმართა, სადაც იმსჯელეს ორი ქვეყნის ინტეგრაციის გაღრმავების შესაძლებლობებზე.
მანამდე ბელარუსის პრეზიდენტმა ალექსანდრ ლუკაშენკომ პარლამენტში გამოსვლისას განაცხადა, რომ ის არასდროს მოაწერს ხელს ისეთ ხელშეკრულებას, რომელიც ქვეყანას სუვერენიტეტს დააკარგინებს.
