უკრაინის სამხედრო-საზღვაო ძალების მეთაური "ტელეკომპანია 4-თან" საუბრისას აცხადებს, რომ რუსეთის მიერ ქერჩის სრუტეში დაკავებული ხომალდებიდან, რომელიც უკრაინას გადაეცა, მოპარულია უნიტაზები და საპირფარეშოს სხვა აქსესუარები. იტყობინება Deutsche Welle.
"გვსურს მთელი მსოფლიოს დავანახოთ რუსების ბარბაროსული ქმედებები", -დასძინა ადმირალმა.
მისივე თქმით, უკრაინული გემები უკვე უკრაინის ტერიტორიულ წყლებში იმყოფებიან.
18 ნოემბერს გახდა ცნობილი, რომ მოსკოვმა ერთი წლის წინ დაკავებული უკრაინული ხომალდები კიევს გადასცა.
რუსეთის საგარეო საქმეთა სამინისტროს ინფორმაციით, რუსულმა მხარემ გამოძიება დაასრულა და რუსეთის ფედერაციის ტერიტორიაზე მათი გაჩერება საჭირო აღარ არის.
განცხადებაში ნათქვამია, რომ რუსეთი მომავალშიც მკაცრად აღკვეთს "თავის საზღვართან ნებისმიერ პროვოკაციას".
2018 წლის 25 ნოემბერს რუსულმა ხომალდებმა, ქერჩის სრუტეში, უკრაინის გემებს ოდესის პორტიდან მარიუპოლის პორტში გადაადგილების დროს ცეცხლი გაუხსნეს. დაიჭრა 6 უკრაინელი სამხედრო, დააკავეს უკრაინული ხომალდები, ამასთან, რუსებმა დაატყვევეს 24 უკრაინელი სამხედრო, რომლებიც 7 სექტემბერს გაათავისუფლეს და უკრაინულ მხარეს გადასცეს.