ამერიკელი რუბენ მარტინესი 12-წლიანი პატიმრობის შემდეგ გაათავისუფლეს, გაირკვა რა, რომ დანაშაული, რომლისთვისაც იხდიდა სასჯელს, მას არ ჩაუდენია.
რუბენ მარტინესი 2007 წელს დააკავეს ლოს ანჯელესში. მას ბრალად რამდენიმე შეიარაღებულ ძარცვაში მონაწილეობა ედებოდა.
დაკავების დღეს, რუბენმა სამუშაო დღე გამთენიის 4:30 საათზე დაიწყო. მძიმე სამუშაო დღის დასრულების შემდეგ, როდესაც სახლში ფეხით მიდიოდა, მას ლოს ანჯელესის პოლიციის დეპარტამენტის თანამშრომლები მიუახლოვდნენ და დააკავეს.
მოგვიანებით, რუბენ მარტინესმა გაარკვია, რომ მას პოლიცია ცხრა დანაშაულის ჩადენას ედავებოდა, მათ შორის 5 შეიარაღებული ძარცვას, 2005 წლის დეკემბრიდან 2007 წლის მაისის ჩათვლით პერიოდში.
ბრალდება ეყრდნობოდა მოწმის ჩვენებას, რომელიც ირწმუნებოდა, რომ მარტინესში დამნაშავე ამოიცნო, მიუხედავად იმისა, რომ დანაშაულის ჩადენისას ბოროტმოქმედს სახე ნიღბით ჰქონდა დაფარული.
რუბენს სთავაზობდნენ ბრალი ეღიარებინა და ჰპირდებოდნენ, რომ ბრალის აღიარების შემთხვევაში, ორი წლის შემდეგ გაათავისუფლებდნენ. რუბენმა პროკურატურის წინადადებაზე უარი განაცხადა.
2008 წელს მარტინესს სასამართლომ 47 წლით თავისუფლების აღკვეთა მიუსაჯა.
ქმრის უდანაშაულობაში ღრმად დარწმუნებული მარია მარტინესი 10 წელზე მეტი ხნის განმავლობაში ცდილობდა რუბენის უდანაშაულობა დაემტკიცებინა, რაც საბოლოოდ გამოუვიდა კიდეც.
სამშაბათს, 19 ნოემბერს, ლოს ანჯელესის პროკურატურამ რუბენ მარტინესის უდანაშაულობა დაადასტურა.
"ეს ღვთიური სასწაულია. მთელი ამ დროის განმავლობაში, ვტიროდი ჩემს საკანში, თითქოს ბნელ გამოქვაბულში ვიყავი და ბოლოს ღმერთმა სიბნელეს სინათლე მოჰფინა", - თქვა რუბენ მარტინესმა გათავისუფლების შემდეგ.
59 წლის რუბენი და მარია ამბობენ, რომ მიუხედავად უდანაშაულოდ გამოცხადების საკმაოდ იშვიათი გამონაკლისებია, მათ არასდროს შერყევიათ რწმენა, რუბენის უდანაშაულობის დამტკიცებისა.