დღეს, 12 ნოემბერს, თბილისის აეროპორტში საქართველოს ხალხთა მსოფლიო კონგრესის რუსული ფილიალის ხელმძღვანელს საქართველოში შესვლაზე უარი ეთქვა, _ ამის შესახებ ნათქვამია კონგრესის პრესამსახურის მიერ გავრცელებულ პრესრელიზში.
"ალექსანდრე კინტერაია ჩამოვიდა ვენიდან, სადაც კონგრესის შტაბბინა მდებარეობს იმ მიზნით, რომ დასწრებოდა კონგრესის თბილისის ფილიალის პრეზენტაციას. როგორც ყოველთვის, არშეშვების მიზეზი ახსნილი არ იყო. სინამდვილეში, ყველაფერი ძალიან მარტივია: ა. კინტერაიას საქართველოში ჩასვლა წარმოადგენდა საქართველოს ხალხთა მსოფლიო კონგრესის პრეზიდენტის ალექსანდრე ებრალიძის ისტორიულ სამშობლოში ვიზიტის საბოლოო მოსამზადებელ ეტაპს", _ ნათქვამია პრერელიზში და აღნიშნულია, რომ ეს არ არის მხოლოდ პირველი არამეგობრული აქცია საქართველოს ხელისუფლებისგან ალექსანდრე ებრალიძის მიმართ.
"2009 წლის 29 მაისს თბილისის აეროპორტში ადგილი ჰქონდა მცდელობას ხელი შეეშალათ რუსი იურისტის იური ნოვოლოდსკის ქვეყნიდან გასვლისათვის, რომელიც საქართველოში ალექსანდრე ებრალიძის იურიდიული წარმომადგენლის სტატუსით იყო ჩამოსული. სასამართლოში მხოლოდ წინასწარი განხილვის სტადიაზეა ა. ებრალიძის მიერ შეტანილი სარჩელი იმ ცილისმწამებლური განცხადებების მიმართ, რომელიც პარლამენტის დეპუტატმა მმართველი პარტიიდან - გ. თარგამაძემ გააკეთა. 2009 წლის 26 ოქტომბერს ამოიწურა პასუხის მიღების კანონით გათვალისწინებული სამთვიანი ვადა, რომელიც ა. ებრალიძეს უნდა მიეღო მის მიერ პრეზიდენტის მიმართ გაკეთებულ განცხადებაზე მისთვის საქართველოს მოქალაქეობის აღდგენის თაობაზე. მაგრამ აქამდე არავითარი პასუხი არ არის მიღებული", _ ნათქვამია პრესრელიზში და იქვე აღნიშნულია, რომ ალექსანდრე ებრალიძე, რომელმაც განაცხადა თავისი განზრახვა მონაწილეობა მიიღოს მომავალ საპრეზიდენტო არჩევნებში და რომელიც ხელმძღვანელობს მსოფლიო კონგრესს, თავის საქმიანობას საქართველოში საქართველოს კანონმდებლობის განუხრელად შესრულების საფუძველზე ანხორციელებს.
"საქართველოს ხელისუფლება, როგორც ამას მათი მოქმედება ადასტურებს, კანონის ყოველგვარი დაცვის გარეშე დევნის ყველას, ვინც მათ არ ეთანხმება", _ ნათქვამია პრესრელიზში.
