დღეს, 21 ოქტომბერს, კანადაში 43-ე საპარლამენტო არჩევნები მიმდინარეობს.
კანადელი მოსახლეობა დღეს გადაწყვეტს, თუ ვინ წარმოადგენს მათ ინტერესებს პარლამენტის ქვედა პალატაში, მომდევნო ოთხი წლის განმავლობაში.
საპარლამენტო არჩევნებში გამარჯვებული პარტიის ლიდერი დაიკავებს ქვეყნის პრემიერ-მინისტრის ოფისს.
კანადის მთავარი საარჩევნო ადმინისტრაციის ცნობით, არჩევნებში მონაწილეობას 21 პოლიტიკური პარტია მიიღებს. საპარლამენტო არჩევნებში მონაწილეობას მიიღებენ ასევე დამოუკიდებელი კანდიდატები.
საარჩევნო უბნები ადგილობრივი დროით 09:30 საათზე გაიხსნა და 19:00 საათზე დაიხურება.
338-ადგილიან პარლამენტში მანდატების მოსაპოვებელ ბრძოლაში ფავორიტებად მმართველი პოლიტიკური ძალა, ლიბერალური პარტია, კონსერვატიული პარტია, ახალი დემოკრატიული პარტია, მწვანეთა პარტია, კვებეკის ბლოკი და კანადის სახალხო პარტია მიიჩნევიან.
საზოგადოებრივი აზრის გამოკითხვების შედეგების მიხედვით, ყველაზე მაღალი რეიტინგით კანადის ამჟამინდელი პრემიერ-მინისტრის ჯასტინ ტრუდოს მთავარი კონკურენტი კონსერვატიული პარტიიდან ენდრიუ შერი სარგებლობს.
გამოკითხულთა 31.5% მზად არის ხმა კონსერვატიულ პარტიას მისცეს, მას ნახევარი პროცენტით ჩამორჩება ლიბერალური პარტია, რომელსაც გამოკითხულთა 31% მისცემდა ხმას.
პოლიტიკური ექსპერტების აზრით, სოციოლოგიურ კვლევებზე დაყრდნობით, ვერცერთ პარტია ვერ შეძლებს უმრავლესობის მიღებას პარლამენტში, ანუ 338 ადგილიდან მინიმუმ 170 მანდატის მიღებას.
უმცირესობის მთავრობა იშვიათი არ არის კანადისთვის, მაგრამ, როგორც წესი, ასეთი საკანონმდებლო ორგანოს მუშაობა მნიშვნელოვნად რთულდება. მაგალითად, ეს მოხდა 2006 წელს, როდესაც კონსერვატიულმა პარტიამ არჩევნებში გაიმარჯვა, მაგრამ ვერ შეძლო ადგილების უმრავლესობის მიღება პალატაში. შედეგად, 2008 წელს, პარლამენტი დაიშალა კანადის გენერალური გუბერნატორის მიერ და იმავე წელს ჩატარდა ახალი არჩევნები, რომლებმაც კონსერვატორებმა გამარჯვება მოიპოვეს.
მიმდინარე საარჩევნო კამპანია კანადაში 11 სექტემბერს დაიწყო. მთავარი ბრძოლა, როგორც მოსალოდნელი იყო, დაიწყო პრემიერ-მინისტრსა და კონსერვატორთა ლიდერს, ენდრიუ შერს შორის.
ენდრიუ შერის გამარჯვების შანსი გაზარდა სკანდალმა, რომელშიც კანადის პრემიერ-მინისტრი ჯასტი ტრუდო გაეხვა.
საქმე ეხება 18 წლის წინ გადაღებულ ფოტოს, რომელიც ჟურნალმა Time-მა გამოაქვეყნა. ფოტოზე ის აღბეჭდილია თეთრი ჩალმით, სახეზე კი ყავისფერი გრიმი უსვია. ფოტო ჯასტინმა კერძო სკოლის წვეულებაზე გადაიღო.
ფოტო გადაღებულია 2001 წელს, ვანკუვერის ელიტურ აკადემია ვესტ-პოინტ-გრეიში, სადაც ის პედაგოგად მუშაობდა.
ჟურნალში ფოტოს გამოქვეყნების შემდეგ ტრიუდომ ჟურნალისტებს განუმარტა, რომ ყავისფერი გრიმი და ალადინის კოსტიუმი გალა-საღამოსთვის დასჭირდა, რომელიც "არაბული ღამეების" თემას ეძღვნებოდა.
მან აღიარა, რომ ფოტოსურათი რასისტული იყო. პრემიერმა ამის გამო ღრმა მწუხარება გამოთქვა და განაცხადა, რომ იმ დროს ამაზე კარგად უნდა დაფიქრებულიყო.
არჩევნების შედეგები, ორშაბათს საღამოსვე გახდება ცნობილი.