ჰონგ კონგში, დიდი ბრიტანეთის საკონსულოსთან შეიკრიბა ჰონგ კონგის საპროტესტო აქციის ასეულობით მონაწილე, რომელთაც ხელთ ეპყრათ ბრიტანეთის დროშები და მღეროდნენ ბრიტანეთის ჰიმნს "ღმერთო გადაარჩინე დედოფალი" - God Save the Queen.
მომიტინგეები ბრიტანეთის ხელისუფლებას ჩინეთის ხელისუფლებაზე ზეწოლას სთხოვდნენ და აღმართული ჰქონდათ ბანერები წარწერით - "ერთი ქვეყანა - ორი სისტემა მკვდარია", "დიდო ბრიტანეთო, გადაარჩინე ჰონგ კონგი".
საპროტესტო მოძრაობა ჰონგ კონგში დაიწყო ექსტრადიციის შესახებ კანონპროექტის წინააღმდეგ. კანონპროექტი შესაძლებლობას აძლევდა ჰონგ კონგის ხელისუფლებას, მსჯავრდებულის ექსტრადიცია მოეხდინა ჩინეთში, მიუხედავად იმისა, რომ ჰონგ კონგში პეკინისგან დამოუკიდებელი მართლმსაჯულების სისტემა მოქმედებს.
გასულ კვირას, ჰონგ კონგის ლიდერმა კერი ლამმა უკან გაიწვია ექსტრადიციის შესახებ კანონპროექტი. თუმცა დემონსტრაციები გასცდა კანონპროექტის გაწვევის მოთხოვნებს და კიდევ უფრო დიდი მასშტაბები შეიძინა ჰონგ კონგისა და პეკინის წინააღმდეგ.
პროდემოკრატიული საპროტესტო აქციის მონაწილეები ითხოვენ პოლიციელების პასუხისმგებლობას, რომელთაც მომიტინგეების წინააღმდეგ ძალადობრივი მეთოდები გამოიყენეს.
ჰონგ-კონგს ჩინეთის სახალხო რესპუბლიკაში სპეციალური ადმინისტრაციული რაიონის სტატუსი აქვს და ფართო ავტონომიით სარგებლობს.
1997 წელს ჰონგ კონგში დასრულდა 156-წლიანი ბრიტანული კოლონიური მმართველობა და გაერთიანებულმა სამეფომ ჰონგ კონგი ჩინეთს გადასცა პირობით, რომ ის 2047 წლამდე შეინარჩუნებდა ფართო ავტონომიას და განსაკუთრებულ ადმინისტრაციულ მოწყობას.
ერთი ქვეყანა - ორი სისტემა გულისხმობს ადმინისტრაციულ მოწყობას, რომლის მიხედვითაც ჩინეთის ყოფილ კოლონიურ ტერიტორიებს (ჰონგ კონგი, მაკაო და ტაივანი) უნდა ჰქონდეთ საკუთარი ეკონომიური და პოლიტიკური სისტემა, იურისდიქცია, დამოუკიდებელ იფინანსური სისტემა და ა.შ.